ޗެމްޕިއަންސް ލީގުގައި ރޭ ލިވަޕޫލުން، 15 ފަހަރަށް ޗެމްޕިއަންސް ލީގު ކާމިޔާބުކޮށްދީފައިވާ ރެއާލް މެޑްރިޑް ބަލިކޮށްފި އެވެ.
ލިވަޕޫލުން ރޭ އަމިއްލަ ދަނޑުގައި ރެއާލް ބަލިކުރީ 2-0 ގެ ނަތީޖާއަކުންނެވެ.
ލިވަޕޫލުން މި މެޗުގައި ލީޑު ނެގީ 52 ވަނަ މިނިޓުގައި އެލެކްސިސް މެކް އެލިސްޓާގެ ލަނޑުންނެވެ. ރެއާލް އަށް 61 ވަނަ މިނިޓުގައި ޕެނަލްޓީއެއް ލިބި އެއްވަރުކުރަން ރަނުގެ ފުރުސަތެއް ލިބުނެވެ. އެކަމަކު، ކީލިއަން އެމްބާޕޭ އަށް ޕެނަލްޓީ ކާމިޔާބެއް ނުކުރެވުނެވެ.
ލިވަޕޫލަށްވެސް 70 ވަނަ މިނިޓުގައި ޕެނަލްޓީއެއް ލިބުނެވެ. ނަމަވެސް އެ ޓީމުގެ މުހައްމަދު ސަލާއަށް ޕެނަލްޓީ ކާމިޔާބު ކުރެވޭ ގޮތެއް ނުވިއެވެ. ލިވަޕޫލުގެ ލީޑު ފުޅާކުރީ 76 ވަނަ މިނެޓުގައި ކޯޑީ ގަކްޕޯ ޖެހި ލަނޑުންނެވެ.
ރެއާލް މެޑްރިޑްގެ މުހިއްމު ކުޅުންތެރިން ތަކެއް ކަމަށްވާ، ވިނީޝިއަސް ޖޫނިއާ އާއި، ރޮޑްރިގޯ އާއި، ޑެނީ ކަރްވަހާލް އާއި އެޑާ މިލިޓާއޯ، އަދި އޯރެލިއެން ޗޫމެނީ، އަނިޔާގެ ސަބަބުން ރޭގެ މެޗުގައި ނުހިމަނަ އެވެ. ޗެމްޕިއަންސް ލީގުގައި ދެން ކުރިއަށް ރެއާލް ކުޅެން ހުރި މެޗުތަކަކީ ކޮންމެހެންވެސް މޮޅުވާން މުހިއްމު މެޗުތަކެކެވެ. ނޫންނަމަ ރެއާލްއަށް މިފަހަރުގެ ޗެމްޕިއަންސް ލީގު ގުރޫޕް ސްޓޭޖުން އަލްވަދާއު ކިޔަން ޖެހިދާނެ އެވެ.
ކުޅުނު ފަސް މެޗުން ވެސް މޮޅުވެ 15 ޕޮއިންޓާ އެކު ލިވަޕޫލު އޮތީ ތާވަލުގެ އެއްވަނައިގައެވެ. އެ ޓީމާ އެންމެ ކައިރީގައި އޮތް އިންޓަ މިލާނަށް ލިބިފައިވަނީ 13 ޕޮއިންޓެވެ. ކުޅުނު ފަސް މެޗުގެ ތެރެއިން ތިން މެޗުން ބަލިވެފައިވާ ރެއާލް އޮތީ ހަ ޕޮއިންޓާ އެކު 24 ވަނައިގަ އެވެ.
މި ލިޔުން ކިޔާލުމުން
