މުޢައްމަރުލް ޤައްޒާފީގެ ވެރިކަން 2011 ވަނަ އަހަރު ވައްޓާލިތާ 15 އަހަރު ފަހުން، ލީބިޔާގެ ދާޚިލީ ހަމަނުޖެހުންތައް ނިމުމަކަށް ގެނެސް އެ ގައުމު އަލުން އެއްބައިވަންތަ ކުރުމަށްޓަކައި އެމެރިކާއާއި މެދުއިރުމަތީގެ ބާރުތަކުން ކުރަމުންދާ މަސައްކަތްތައް ވަނީ ވަރަށް ބޮޑަށް ވަރުގަދަކޮށްފައެވެ. ޤައްޒާފީގެ 42 އަހަރުވީ ވެރިކަން ނިމުމަކަށް އައުމަށްފަހު، ކުރިން އެފްރިކާގެ އެންމެ މުއްސަނދި އެއް ގައުމުގެ ގޮތުގައި އޮތް ލީބިޔާ ވަނީ ވާދަވެރި ދެ ސަރުކާރެއްގެ ދަށަށް ބެހިފައެވެ. އެއީ އދ. އިން ބަލައިގެންފައިވާ، ބޮޑުވަޒީރު ޢަބްދުލްޙަމީދު ދްބެއިބާގެ އިސްނެންގެވުމުގެ ދަށުން ޓްރިޕޮލީގައި ހިންގާ ގަވަރންމަންޓް އޮފް ނެޝަނަލް ޔުނިޓީ (ޖީއެންޔޫ) އަދި ޚަލީފާ ހަފްތަރުގެ ލީބިއަން ނެޝަނަލް އާމީ (އެލްއެންއޭ) ގެ ތާއީދާއެކު އިރުމަތީގެ ޓޮބްރުކްގައި ހިންގާ އިދާރާއެވެ.
އެމެރިކާގެ ރައީސް ޑޮނަލްޑް ޓްރަމްޕްގެ އެފްރިކާ އަދި މެދުއިރުމަތީގެ މުޝީރު މަސާދު ބޫލޮސް އިސްވެ ހުންނަވައި، ވޮޝިންގޓަނުން ދަނީ ދެ ސަރުކާރު އެއްބައިވަންތަކުރުމަށް އާ ޕްލޭނެއް ހުށަހަޅަމުންނެވެ. މި ޕްލޭންގެ ދަށުން، ދެ ސަރުކާރުން އެއްބާރުލުން ދީފިނަމަ ލީބިޔާގެ ތެޔޮ ވަޅުތަކަށް އެމެރިކާގެ ބޮޑެތި އިންވެސްޓްމަންޓްތައް ގެނައުމަށް ވަނީ ވަޢުދުވެފައެވެ. އަދި ބާރުތައް ހިއްސާކުރުމުގެ ގޮތުން ޖީއެންޔޫގެ ވެރިޔާގެ ގޮތުގައި ދްބެއިބާ ދެމިހުންނަވާއިރު، ހަފްތަރުގެ ދަރިކަލުން އަދި އެލްއެންއޭގެ އަސްކަރީ ވެރިޔާ ސައްދާމް ހަފްތާރަށް ރައީސްކަން ދިނުން ހިމެނެއެވެ.
އެމެރިކާގެ އިތުރުން ސަރަޙައްދީ މުހިންމު ޤައުމުތަކުން ދަނީ ލީބިޔާ އެއްބައިވަންތަކުރުމަށް އެއްބާރުލުން ދެމުންނެވެ. އެގޮތުން ކުރިން ޖީއެންޔޫއަށް ސިފައިން ފޮނުވި ތުރުކީވިލާތުގެ ޚާރިޖީ ވަޒީރު ހަކާން ފިދާން ވަނީ ދްބެއިބާ އާއި ޚަލީފާ ހަފްތާރު އަދި ސައްދާމް ހަފްތާރާ ބައްދަލުކުރައްވައި ސުލްޙައިގެ މަޝްވަރާތައް ކުރިއަށް ގެންދަވާފައެވެ. އިރުމަތީގެ އިދާރާއަށް ތާއީދުކުރާ މިޞްރުން ވެސް ސުލްޙައިގެ ވާހަކަތަކުގައި ބައިވެރިވަމުންދާއިރު، ރައީސް އަލް ސީސީ ވަނީ ޚަލީފާ ހަފްތާރާ ބައްދަލުކުރައްވާފައެވެ. އަދި މިޞްރުގެ ޖާސޫސީ އިދާރާގެ ވެރިޔާ ވަނީ ޓްރިޕޮލީއަށް ޒިޔާރަތްކުރައްވާފައެވެ. މީގެއިތުރުން، ޤަޠަރުން ދަނީ އދ. ގެ ސުލްޙައިގެ މަގުޗާޓަށް ތާއީދުކޮށް އިންތިޚާބުތައް ބޭއްވުމަށް ބާރުއަޅަމުންނެވެ.
މި މަޝްވަރާތަކުގެ އެދެވޭ ނަތީޖާއެއްގެ ގޮތުން، ފާއިތުވި ދިހަވަރަކަށް އަހަރުގެ ތެރޭގައި ފުރަތަމަ ފަހަރަށް 2026 ވަނަ އަހަރަށް އެއްބައިވަންތަ ޤައުމީ ބަޖެޓެއްގައި މިހާރު ވަނީ ސޮއިކޮށްފައެވެ. ނަމަވެސް، އެއްބައިވަންތަ ސަރުކާރެއް އެކުލަވާލުމުގެ މުހިންމު ފިޔަވަޅުތައް އަދިވެސް އޮތީ މުޅިން ނުނިމިއެވެ.
އެއްބައިވަންތަ ލީބިޔާއެއް އޮތުމަކީ އެމެރިކާގެ ހަކަތަ ކުންފުނިތަކަށާއި، ޔޫރަޕަށް ކުރާ ޤަވާޢިދާ ޚިލާފު ހިޖުރަކުރުން ހުއްޓުވުމަށް މުހިންމު ކަމެކެވެ. އާންމު ރައްޔިތުންގެ ބައިވެރިވުން ކުޑަވުމުގެ ސަބަބުން މި ޕްލޭނަށް ބައެއް ފާޑުކިޔުންތައް އަމާޒުވެފައިވީ ނަމަވެސް، މިއީ ލީބިޔާއަށް ދާއިމީ ހަމަޖެހުމެއް ގެނެސްދޭނެ މަގެއް ކަމަށް ގިނަ މާހިރުން ދެކެއެވެ.