މޯލްޑިވްސް އިސްލާމިކް ބޭންކުގެ ޚިދުމަތްތައް ފުޅާކޮށް މީހުން ދިރިއުޅޭ އިތުރު 19 ރަށެއްގައި އޭޓީއެމް ބެހެއްޓުމުގެ އެއްބަސްވުމުގައި ސޮއިކޮށްފިއެވެ.
ރައީސުލްޖުމްހޫރިއްޔާ އޮފީހުގައި ބޭއްވި މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
މި އެއްބަސްވުން އެކުލަވާލާފައިވަނީ އިޤްތިޞާދީ ތަރައްޤީއާއި ވިޔަފާރިއާއިބެހޭ ވުޒާރާއާއި މޯލްޑިވްސް އިސްލާމިކް ބޭންކާއި ދެމެދުއެވެ. އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. އަދި އިސްލާމިކް ބޭންކުގެ ފަރާތުން ސޮއިކުރެއްވީ އެ ބޭންކުގެ ސީއީއޯ މުފައްދަލް އިދުރީސް އެވެ.
އެއްބަސްވުމުގައި ސޮއިކުރެއްވުމަށް ފަހު އެމްއައިބީގެ ސީއީއޯ ދެއްކެވި ޕްރެޒެންޝޭނުން ދައްކާ ގޮތުގައި، އަންނަ އަހަރު އެ ބޭންކުންގެ އޭޓީއެމް ބަހައްޓަން މަސައްކަތް ފަށާނެ ރަށްތަކަކީ ހއ. އިހަވަންދޫ، ހދ. ހަނިމާދޫ، ށ. ފުނަދޫ، ރ. ހުޅުދުއްފާރު، ރ. އުނގޫފާރު، ރ. ދުވާފަރު، ބ. ކެންދޫ، ބ. ތުޅާދޫ، ބ. ގޮއިދޫ، ކ. ހިންމަފުށި، އއ. ތޮއްޑޫ، އދ. މާމިގިލި، މ. މުލައް، މ. ދިއްގަރު، ދ. މީދޫ، ލ. ފޮނަދޫ، ލ. އިސްދޫ-ކަލައިދޫ އަދި ގދ. ފަރެސްމާތޮޑާ، ސ. ހުޅުމީދޫ އެވެ.
މިވަގުތުވެސް ރާއްޖޭގެ އެކި ސަރަހައްދުތަކުގައި 39 އޭޓީއެމްއެއް ބަހައްޓައިގެން އެމްއައިބީން ދަނީ ޚިދުމަތް ދެމުންނެވެ. އަދި މި އެއްބަސްވުމާއެކު އިތުރު 23 އޭޓީއެމެއް 19 ރަށެއްގައި ބަހައްޓާނެ ކަމަށް އެމްއައިބީއިން ވިދާޅުވެއެެވެ. މީގެ އިތުރުންވެސް ޚިދުމަތް އިތުރަށް ފުޅާކުރުމަށް އެމްއައިބީގެ އިތުރު ޚިދުމަތްތަކެއް ރަށްރަށުގައި ޤާއިމްކުރާނެ ކަމަށް ސީއީއޯ މުފައްދަލް އިދުރީސް ވިދާޅުވެއެވެ.
މި ލިޔުން ކިޔާލުމުން
