އައިޖީސީއެސްއީ އިނގިރޭސި ލިސްނިންގ އިމްތިހާނާ ގުޅިގެން، މާދަމާ ހެނދުނު މާލޭގެ ސެކަންޑަރީ ސްކޫލްތައް ހިމެނޭ ސަރަހައްދުތަކުގެ މަގުތައް އާންމު ދަތުރުފަތުރަށް ވަގުތީގޮތުން ބަންދުކުރަން ފުލުހުން ނިންމައިފިއެވެ.
ފުލުހުން މިއަދު ނެރުނު ބަޔާނެއްގައި ބުނެފައިވަނީ، 21 އޮކްޓޯބަރު 2026 ވާ ބުދަ ދުވަހުގެ ހެނދުނު 09:15 އިން ފެށިގެން 10:30 އާ ހަމައަށް އެ ސަރަހައްދުތަކުގެ މަގުތައް އާންމު ޓްރެފިކަށް ބަންދުވާނެ ކަމަށެވެ.
ފުލުހުން ބުނީ، މި ފިޔަވަޅު އަޅަނީ އިމްތިހާނު ހަދާ ދަރިވަރުންނަށް އަމާން އަދި ހަމަހިމޭން މާހައުލެއް ފަހިކޮށްދީ، އަޑުގަދަވުމުގެ ސަބަބުން ދިމާވެދާނެ ދަތިތައް ކުޑަކުރުމަށް ކަމަށެވެ.
އަދި އިމްތިހާނު ކުރިއަށްދާ ވަގުތު އެ ސަރަހައްދުތަކުގައި ދިރިއުޅޭ މީހުންނާއި އެ ސަރަހައްދުތައް ބޭނުންކުރާ ފަރާތްތަކުން، އިމާރާތްކުރުމުގެ މަސައްކަތްތައް ފަދަ އަޑުގަދަ ކަންކަމާއި ދަރިވަރުންނަށް ދަތިވާނެ އެންމެހައި ކަންކަމުން ދުރުހެލިވުމަށް ފުލުހުން ވަނީ އިލްތިމާސްކޮށްފައެވެ.
މަގުތައް ބަންދުކުރުމުގެ ސަބަބުން ދަތުރުފަތުރުކުރާ ފަރާތްތަކަށާއި އާންމުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މައާފަށް އެދިފައެވެ. މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުމަށް ވެސް ފުލުހުން ވަނީ ޝުކުރު އަދާކޮށްފައެވެ.
މީގެ ކުރިން ވެސް އައިޖީސީއެސްއީ އިނގިރޭސި އިމްތިހާނު ހަދާއިރު ސްކޫލްތައް ހިމެނޭ ސަރަހައްދުތަކުގެ މަގުތައް ބަންދުކޮށްފައިވެއެވެ. މި އަހަރުގެ އެސްއެސްސީ އަދި އޯލެވެލް އިމްތިހާނުތަކުގައި 8,111 ދަރިވަރުން ބައިވެރިވެފައިވާއިރު، އިމްތިހާނުތައް ފެށީ މިދިޔަ ސެޕްޓެމްބަރު 20 ގައެވެ.
