ހއ. ބާރަށުގައި ޤާއިމުކުރި "ހެލްތް ކެއަރ ވޭސްޓް މެނޭޖްމެންޓް ފެސިލިޓީ" ގެ ޢަމަލީ މަސައްކަތްތައް މި ހިނގާ އޮކްޓޫބަރު މަހުގެ ތެރޭގައި ފެށުމަށް ހަމަޖެހިއްޖެ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ހާމަކޮށްފިއެވެ.
ރާއްޖޭގެ ސިއްޙީ ޚިދުމަތްދޭ މަރުކަޒުތަކުން އުފެދޭ ނުރައްކާތެރި ކުނި ތިމާވެއްޓާ ރައްޓެހި ގޮތެއްގައި މެނޭޖްކުރުމަށް ސަރުކާރުން ކުރަމުންދާ މަސައްކަތުގެ ދަށުން މި ފެސިލިޓީ ޤާއިމުކޮށްފައިވާ ކަމަށް ވުޒާރާއިން ބުނީއެވެ. މިއީ އެ ވުޒާރާގެ "އެލިމިނޭޓިންގް ޕޮޕްސް" މަޝްރޫޢުގެ ދަށުން، ޞިއްޙަތާ ބެހޭ ވުޒާރާއާ ދެމެދު ވެވުނު ފަހުމުނާމާ (އެމް.އޯ.ޔޫ) ގެ ދަށުން ކާމިޔާބުކަމާއެކު ބިނާކުރެވުނު މަރުކަޒެކެވެ.
މި ޒަމާނީ ފެސިލިޓީއަކީ ހޮސްޕިޓަލްތަކާއި ޞިއްޙީ މަރުކަޒުތަކުން އުފެދޭ ވިހަ އަދި ނުރައްކާތެރި ކެމިކަލް އެކުލެވޭ ކުނި އެންދުމުގެ ބަދަލުގައި، ޒަމާނީ ޓެކްނޮލޮޖީގެ އެހީގައި ރައްކާތެރިކަމާއެކު ނައްތާލުމަށް ފަރުމާކޮށްފައިވާ ތަނެކެވެ. އެގޮތުން، ޖަރާސީމާއި ވިހަ މާއްދާތައް ވެށްޓަށް ބޭރުވިޔަނުދީ ސްޓެރިލައިޒް ކުރުމަށްޓަކައި ޚާއްޞަ ޒަމާނީ "އޮޓޯކްލޭވް" މެޝިނާއި، އެކަމަށް ބޭނުންވާ އެންމެހައި ޒަމާނީ ވަސީލަތްތައް މިހާރު ވަނީ މި މަރުކަޒުގައި ފުރިހަމަކޮށް ނިންމާލެވިފައެވެ.
މި ފެސިލިޓީގެ އޮޕަރޭޝަންތައް މި މަހުގެ ތެރޭގައި ފެށުމާއެކު، ބާރަށުގެ އިތުރުން އެ އަތޮޅާއި ކައިރި ސަރަޙައްދުތަކުގެ ޞިއްޙީ ޚިދުމަތްދޭ ތަންތަނުން އުފެދޭ ކުނި ބައިނަލްއަޤްވާމީ ރައްކާތެރި މިންގަނޑުތަކާ އެއްގޮތަށް ނައްތާލެވިގެންދާނެ ކަމަށް ވުޒާރާއިން ބުނެފައިވެއެވެ. މިއީ ރަށްރަށުގެ ވެށި ތަޣައްޔަރުވުމުން ސަލާމަތްކޮށް، އާންމު ޞިއްޙަތު ރައްކާތެރިކުރުމަށް އެޅިގެންދާ ވަރަށް މުހިންމު ފިޔަވަޅެއްގެ ގޮތުގައި ސަރުކާރުން ދެކެއެވެ.
