މަސްތުގެ ހާލަތުގައި ތިބެގެން މަގުމަތީގައި ވެހިކަލް ދުއްވާ މައްސަލަތައް އާދާޔާ ހިލާފަށް ގިނަކަން ފާހަގަކުރެވިފައިވާ ކަމަށް ދާޚިލީ ސަލާމަތާއި މަސައްކަތްތެރިކަމާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
"އަހާ" ފޯރަމްގައި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ސަރުކާރުން މަގުތަކަށް އިތުރަށް ފުލުހުން ނެރެ މަގުމަތީގެ ރައްކާތެރިކަން ބެލެހެއްޓުން ހަރުދަނާކޮށްފައިވީ ނަމަވެސް، ހިތާމަވެރި ހާދިސާތައް ހިނގަމުންދާ ކަމަށެވެ. މިއީ ހަމައެކަނި ލައިސަންސް ނެތި ދުއްވުމުގެ މައްސަލައެއް ނޫން ކަމަށާއި، ބައެއް ފަރާތްތަކުން ގާނޫނާއި ގަވާއިދަށް އެއްވެސް ވަރަކަށް އަހުލުވެރިނުވެ ލައިސަންސް ނަގައިގެން އުޅޭކަން އެކްސިޑެންޓްތައް ހިނގާ ގޮތުން ސާފުވާ ކަމަށްވެސް އިޙްސާން ފާހަގަކުރެއްވިއެވެ.
އޭނާ ވިދާޅުވި ގޮތުގައި މަސްތުގެ ހާލަތުގައި ވެހިކަލް ދުއްވާ މައްސަލައަށް މިހާރު ޚާއްޞަ ސަމާލުކަމެއް ދީގެން ފުލުހުން ދަނީ މަސައްކަތް ކުރަމުންނެވެ. އެގޮތުން ފާއިތުވި ދެ އަހަރުގެ ތެރޭގައި އެހެން މީހުންނަށް ނުރައްކާވާ ގޮތަށް ދުއްވި 1،904 ވެހިކަލް ޓޯކޮށް، ބޮޑެތި އަދަދުތަކުން ޖޫރިމަނާކުރުމުގެ އިތުރުން ބައެއް މީހުންގެ މައްޗަށް ޖިނާއީ ދައުވާ އުފުލާފައިވާނެ ކަމަށް ވަޒީރު ވިދާޅުވިއެވެ.
މި ވާހަކަތައް ވަޒީރު ދައްކަވާފައިވަނީ މާލޭގެ މަގުތަކުގައި ނުރައްކާތެރިކޮށް ދުއްވާ މައްސަލައިގައި އާންމުންގެ ފާޑުކިޔުންތައް ފުލުހުންނަށް އަމާޒުވެފައިވާ ދަނޑިވަޅެއްގައެވެ. ޚާއްޞަކޮށް، ސޯސަންމަގުގައި ނުރައްކާތެރިކޮށް ދުއްވި ސައިކަލަކުން ޖެހި ހިނގި އެކްސިޑެންޓެއްގައި ސީރިއަސް އަނިޔާތަކެއްވި އަންހެނަކު ނިޔާވުމާ ގުޅިގެން މި ކަންބޮޑުވުންތައް ވަނީ އިތުރުވެފައެވެ. އެ މައްސަލައިގައި ހައްޔަރުކުރި މީހާއަކީ ލައިސެންސް ނެތި ދުއްވައިގެން އެކި ފަހަރު މަތިން ޖޫރިމަނާކޮށްފައިވާ މީހެކެވެ. މީގެ އިތުރުން، މާލޭގައި ނުރައްކާތެރިކޮށް ސައިކަލް ދުއްވި ބަޔަކު ފެންނަ ވީޑިއޯއެއް އާންމުވުމާ ގުޅިގެން އެ މީހުން ހޯދުމުގެ މަސައްކަތްވެސް ފުލުހުން ދަނީ ކުރަމުންނެވެ.
މި ލިޔުން ކިޔާލުމުން
