ރައީސަށް އިންޖިނިއަރިންގ އެވޯޑު ދޭ ވާހަކައަކީ ކަނޑައެޅިގެން ދޮގެއް: މުއްޠަލިބު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އިންޖިނިއަރިންގ ދާއިރާގެ އެވޯޑެއް ދޭން އުޅޭ ކަމަށް ބުނެ "އަދަދު" ނޫހުގައި ޝާއިޢުކޮށްފައިވާ ޚަބަރަކީ އެއްވެސް ޙަޤީޤަތެއް ނެތް، ކަނޑައެޅިގެން ދޮގު ޚަބަރެއް ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. މިނިސްޓަރު މުއްޠަލިބު ލައްވައި ރައީސް މުޢިއްޒަށް އިންޖިނިއަރިންގ އެވޯޑެއް އަރުވަނީ ކަމަށް ބުނެ ފަތުރަމުންދާ ވާހަކަތަކާ ގުޅިގެން، އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ، އެ އެވޯޑަކީ ވަކި އުޞޫލުތަކެއްގެ ދަށުން ދެވޭ އެވޯޑެއް ކަމަށެވެ. އެގޮތުން، މިއީ އުޞޫލު ގެޒެޓުކޮށް، ކުރިމަތިލުމަށް ޢާންމުކޮށް ހުޅުވާލައިގެން، ލިބުނު އެޕްލިކޭޝަންތައް މިނިވަން ކޮމިޓީއަކުން ބަލައި އިންޓަވިއު ކުރުމަށްފަހު އެވޯޑް ލިބޭ ފަރާތްތައް ކަނޑައަޅާފައިވާ އެވޯޑެއް ކަމަށް އެމަނިކުފާނު ފާހަގަކުރެއްވިއެވެ.

އިންޖިންނިއަރިންގ އެވޯޑަކީ އުޞޫލު ގެޒެޓުކޮށް، އެޕްލައިކުރުމަށް ހުޅުވާލާ، ލިބުނު އެޕްލިކޭޝަންތައް މިނިވަން ކޮމިޓީއަކުން ބަލާ އިންޓަވިއުކޮށް އެވޯޑް ލިބޭ ފަރާތްތައް ކަނޑައަޅާފައިވާ އެވޯޑެކެވެ. ރައީސުލްޖުމްހޫރިއްޔާ ޑރ. މުޢިއްޒަށް އެވޯޑެއް ދޭ ވާހަކައަކީ ކަނޑައެޅިގެން ދޮގެކެވެ.… pic.twitter.com/almE0eQosK

— Abdulla Muththalib (@muththo) September 9, 2026

އަދި މި އެވޯޑު ރައީސުލްޖުމްހޫރިއްޔާއަށް އެރުވުމަށް ނިންމަވާފައިވާ ކަމަށް ޝާއިޢުކޮށްފައިވާ ޚަބަރަކީ ކަނޑައެޅިގެން ދޮގެއް ކަމަށް މިނިސްޓަރު ވިދާޅުވިއެވެ. މީގެއިތުރުން، މިނިސްޓަރު ވިދާޅުވީ، މިފަދަ އެއްވެސް ޙަޤީޤަތެއް ނެތް ޚަބަރެއް ލިޔެފައިވަނީ ރައީސް ޑރ. މުޢިއްޒަކީ އިންޖިނިއަރިންގ ދާއިރާއިން ޤައުމަށް ނުހަނު އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅަކަށް ވާތީ، އެމަނިކުފާނަށް އެ އެވޯޑު ލިބުން ޙައްޤު ކަމަށް "އަދަދު" ނޫހުން ޤަބޫލުކުރާތީ ކަމަށް ދެކެވަޑައިގަންނަވާ ކަމަށެވެ. ރައީސް ޑރ. މުޙައްމަދު މުޢިއްޒަކީ ސިވިލް އިންޖިނިއަރިންގގެ ދާއިރާއިން ޑޮކްޓަރ އޮފް ފިލޯސަފީ (ޕީއެޗްޑީ) ޙާޞިލުކުރައްވައިގެން ހުންނެވި، އަދި ރާއްޖޭގެ އުމްރާނީ ތަރައްޤީގެ މުހިންމު ގިނަ މަޝްރޫޢުތަކެއް ހިންގެވުމުގައި އިސްދައުރެއް އަދާކުރައްވާފައިވާ ބޭފުޅެކެވެ.