ޣައްޒާގައި ހަރަކާތްތެރިވި ވޯލްޑް ސެންޓްރަލް ކިޗަން (ޑަބްލިއުސީކޭ) ގެ އެހީގެ ގާފިލާއަކަށް 2024 ވަނަ އަހަރު އިސްރާއީލުން ދިން ނުރައްކާތެރި ހަމަލާގެ ޖިނާއީ ތަހުގީގެއް ނުހިންގަން ނިންމުމަކީ ލަދުވެތި ނިންމުމެއް ކަމަށް ބުނެ އިނގިރޭސިވިލާތް، އޮސްޓްރޭލިއާ އަދި ކެނެޑާއިން ވަރަށް ބޮޑަށް ފާޑުކިޔައިފިއެވެ. މި ތިން ގައުމުން ނެރުނު ގުޅިފައިވާ ބަޔާނެއްގައި، ބައިނަލްއަގުވާމީ ގާނޫނުތަކަށް އިހުތިރާމްކޮށް، ޒިންމާދާރު ފަރާތްތައް ޖަވާބުދާރީ ކުރުވުމަށް ގޮވާލާފައިވެއެވެ. އަދި މި ނިންމުމަކީ އެކަށީގެންވާ ވަރަށް ވުރެ ކުޑަ އަދި ލަސް ނިންމުމެއް ކަމަށާއި، މި ހާދިސާގައި ގެއްލުން ލިބުނު ފަރާތްތަކަށް އިންސާފު ހޯދައިދިނުމަށް އަދިވެސް މަސައްކަތް ކުރާނެ ކަމަށް ބުނެފައިވެއެވެ.
މީގެ އިތުރުން، އިންސާނީ ހިދުމަތްތެރިންގެ އަގު ވަޒަންކުރާ ދުވަހެއްގައި އިސްރާއީލުން މިފަދަ ނިންމުމެއް އިއުލާނު ކުރުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް އެ ބަޔާނުގައި ފާހަގަކޮށްފައިވެއެވެ.
މި ހާދިސާއާ ގުޅިގެން ޕޯލެންޑްގެ ހާރިޖީ ވުޒާރާއިންވެސް ވަނީ ވަރަށް ބޮޑަށް މާޔޫސްވެފައިވާ ކަމަށް ބުނެ، ވޯސޯގައި ހުންނަވާ އިސްރާއީލުގެ ސަފީރު ހާޒިރުކޮށްފައެވެ. އަދި އޮސްޓްރޭލިއާއިން ވެސް ވަނީ އެ ގައުމުގައި ހުންނަވާ އިސްރާއީލުގެ ސަފީރު ހާޒިރުކޮށް ކަންބޮޑުވުން ފާޅުކޮށްފައެވެ.
އޭޕްރީލް 2024 ގައި ކާބޯތަކެތީގެ އެހީ ފޯރުކޮށްދިނުމުގެ މަސައްކަތް ބެލެހެއްޓުމަށްފަހު ދަތުރުކުރި ގާފިލާއަށް އިސްރާއީލުން ޑްރޯން ބޭނުންކޮށްގެން ދިން މި ހަމަލާގައި އެހީތެރިންގެ ހަތް މީހަކު މަރުވިއެވެ. އޭގެ ތެރޭގައި އިނގިރޭސިވިލާތުގެ ތިން މީހުންނާއި، އެމެރިކާ އަދި ކެނެޑާގެ ޑުއަލް ސިޓިޒަންޝިޕް އޮތް މީހަކާއި، ޕޯލެންޑް، އޮސްޓްރޭލިއާ އަދި ފަލަސްތީނުގެ ރައްޔިތަކު ހިމެނެއެވެ. އިސްރާއީލު އަސްކަރިއްޔާއިން މި ހާދިސާ ސިފަކުރީ "ހިތާމަވެރި ކުށްހީއެއް" ގެ ގޮތުގައެވެ.
އިސްރާއީލުން މި ހަމަލާގެ އެއްވެސް ތަހުގީގެއް ނުހިންގާނެ ކަމަށް އިއުލާންކުރީ، ޣައްޒާ ހަނގުރާމައިގައި އިސްރާއީލު ސިފައިންގެ އަމަލުތަކާ ގުޅޭ 150 ހާދިސާއެއް އަލުން ބެލުމަށް ފަހުގައެވެ. އޭގެ ތެރޭގައި ފަލަސްތީނުގެ ފަސް އަހަރުގެ ކުއްޖެއް ކަމަށްވާ ހިންދު ރަޖަބް މަރާލި ހާދިސާވެސް ހިމެނެއެވެ.
ވޯލްޑް ސެންޓްރަލް ކިޗަންއިން ބުދަ ދުވަހު ބުނެފައިވަނީ އިސްރާއީލުގެ ނިންމުމަކީ ހަގީގަތާ ހިލާފު ނިންމުމެއް ކަމަށާއި، އިސްރާއީލު އަސްކަރިއްޔާއަށް އަމިއްލަ އަމަލުތައް އިތުބާރު ހުރި ގޮތެއްގައި ތަހުގީގު ނުކުރެވޭނެތީ މިނިވަން ތަހުގީގެއް ހިންގަންޖެހޭ ކަމަށެވެ. އަދި އިނގިރޭސިވިލާތުގެ މިޑްލް އީސްޓް މިނިސްޓަރު ސްޓީވަން ޑޯޓީ ވިދާޅުވީ، މި މައްސަލައިގައި އަވަސް ޖަވާބުތަކެއް ހޯދުމަށް އިނގިރޭސި ސަރުކާރުން ކުރަމުންދާ މަސައްކަތް ހުއްޓާނުލައި ކުރިއަށް ގެންދާނެ ކަމަށެވެ.
މި ލިޔުން ކިޔާލުމުން
