މިއަދުގެ ޚުޠުބާގައި އަލިއަޅުވާލާފައިވާ ފަދައިން، އަހަރެމެންގެ ތެރޭގައި ފަރުޟު އަޅުކަންތަކަށް ރައްކާތެރިވާ ކެތްތެރިން ސިފަވިޔަސް، މީސްތަކުންނާ މުޢާމަލާތުކުރުމުގައި ހަރުކަށިކަމާއި ދޫނުދިނުމުގެ ނުބައި ސިފަ ހުރުމަކީ ހިތާމަހުރި ކަމެކެވެ. ވިޔަފާރީގެ މުޢާމަލާތްތަކުގައާއި ދެބަސްވާ ހިނދުގައި މަޑުމައިތިރިކަން އިސްކުރުމަކީ މުސްލިމުންގެ މައްޗަށް ލާޒިމުވެގެންވާ ކަމެކެވެ. މާތް ނަބިއްޔާ ﷺ ގެ ސީރަތަށް ބަލާއިރު، އެކަލޭގެފާނު އަހުލުވެރިންނާއި، އަޞްޙާބުންނާއި، އަވަށްޓެރިންނާ މުޢާމަލާތު ކުރެއްވީ ނުހަނު އޯގާތެރިކަމާއެކުގައެވެ.
މާތް ﷲ ވަނީ ފިރުޢައުނު ފަދަ ބޮޑު ކާފިރެއްގެ ގާތަށް މޫސާގެފާނާއި ހާރޫނުގެފާނު ފޮނުއްވި ހިނދުވެސް، މަޑުމައިތިރި ބަހުން ވާހަކައްދެއްކެވުމަށް އަމުރުކުރައްވާފައެވެ. ދީން ޤަބޫލުނުކުރާ މީހުންނާ މުޚާޠަބުކުރާއިރުވެސް މަޑުމައިތިރިކަން އިސްކުރަންޖެހޭނަމަ، މުސްލިމް އަޚުން އެކަކުއަނެކަކާ މުޢާމަލާތުކުރާއިރު އޯގާވެރިކަމާއި ތަވާޟުޢުވެރިކަން އިސްކުރުން މާ އައުލާކަން ބޮޑެވެ.
"ނަރަކަ ޙަރާމްކުރެއްވިގެންވަނީ (މީސްތަކުންނަށް) އޯގާތެރި، މަޑުމައިތިރި، މުޢާމަލާތުކުރާން ފަސޭހަ، ގާތްކަން ބަހައްޓާ ކޮންމެ މީހަކަށެވެ."
އެހެންކަމުން، އަހަރެމެންގެ ދިރިއުޅުމުގެ އެންމެހައި މުޢާމަލާތްތަކުގައި ހަރުކަށިކަމާއި ބޮޑާކަން ދޫކޮށް، އޯގާތެރިކަމާއި މަޑުމައިތިރިކަން އިސްކޮށްގެން މުޢާމަލާތުކުރާ ބަޔަކަށް އަހަރެމެންވާންޖެހެއެވެ. ސުވަރުގޭގެ އަހުލުވެރިންގެ މަތިވެރި ސިފަތަކުން ސިފަލިބިގަތުމަށް އަވަސްވެގަންނަމާބަހޭ!






