ލެކްނޯ ރިޒޯޓް ވޮލީ ޗެމްޕިއަންޝިޕް 2026 ގެ ފައިނަލް މެޗާއި މުބާރާތް ނިންމުމުގެ ރަސްމިއްޔާތު ނައިބު ރައީސް، އަލްއުސްތާޛު ޙުސައިން މުޙައްމަދު ލަޠީފް، ޝަރަފުވެރިކޮށްދެއްވައިފިއެވެ.
ވަން އެންޑް އޮންލީ ރީތި ރަށް މޯލްޑިވްސް ގައި ކުރިއަށްގެންދިޔަ މި މެޗު ފެއްޓުމުގެ ކުރިން ނައިބު ރައީސް ވަނީ، ލެކްނޯ ރިޒޯޓް ވޮލީ ޗެމްޕިއަންޝިޕް 2026 ގެ ޓްރޮފީ ތަޢާރަފުކޮށްދެއްވާފައެވެ. އަދި އެމަނިކުފާނު ވަނީ، މެޗުގައި ބައްދަލުކުރި ދެ ޓީމު، ވަން އެންޑް އޮންލީ ރީތި ރަށް ރިޒޯޓާއި ބަނޑޮސް އައިލެންޑް ރިޒޯޓުގެ ކުޅުންތެރިންނާއި މެޗުގެ އޮފިޝަލުންނާ ސަލާމްކުރައްވާފައެވެ.
ފޯރިގަދަ ކުޅުމަކަށް ފަހު، ސީދާ 3 ސެޓުން މެޗު ކާމިޔާބުކޮށް، މުބާރާތުގެ ތަށި ދިފާޢުކޮށްފައިވަނީ، ވަން އެންޑް އޮންލީ ރީތި ރަށް ރިޒޯޓުގެ ޓީމުންނެވެ. ޗެމްޕިއަން ޓީމަށް ވާދައިގެ ތައްޓާއި މެޑަލް ހަވާލުކޮށްދެއްވާފައިވަނީ ނައިބު ރައީސެވެ.