މިއަދަކީ ދިވެހިރާއްޖެއާއި ފެޑެރަލް ޑިމޮކްރެޓިކް ރިޕަބްލިކް އޮފް އިތިއޯޕިއާއާ ދެމެދު ސީދާ ވައިގެ ދަތުރުފަތުރުގެ ހިދުމަތް ގާއިމުކުރުމަށްޓަކައި މުހިންމު އެއްބަސްވުމެއްގައި ސޮއިކުރެވުނު ދުވަހެކެވެ. މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަންގައި ބޭއްވި ހާއްސަ ރަސްމިއްޔާތެއްގައި، ސީދާ ދަތުރުތައް ފެށުމުގެ އެއްބަސްވުމުގެ އިތުރުން ދެ ޤައުމުގެ މެދުގައި ވައިގެ ދަތުރުފަތުރުގެ ދާއިރާއިން ގުޅުން ބަދަހިކުރުމާ ބެހޭ ފަހުމްނާމާ އެއްގައިވެސް ވަނީ ސޮއިކޮށްފައެވެ. މި އެއްބަސްވުންތަކުގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަން މުހައްމަދު އަމީނެވެ. އަދި އިތިއޯޕިއާ ސަރުކާރުގެ ފަރާތުން ސޮއިކުރެއްވީ އެ ޤައުމުގެ ސިވިލް އޭވިއޭޝަން އޮތޯރިޓީގެ ޑިރެކްޓަރ ޖެނެރަލް މިސްޓަރު ޔޮއާނަސް އަބޭރާ ބެލެޓޭ އެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަފުޅު ދައްކަވަމުން މިނިސްޓަރ އަމީން ފާހަގަކުރެއްވި ގޮތުގައި، އިތިއޯޕިއާއަކީ އެފްރިކާ ބައްރުގެ ޤައުމުތަކުގެ ތެރެއިން ރާއްޖެއިން ވައިގެ ދަތުރުފަތުރުގެ އެއްބަސްވުން އެކުލަވައިލި 6 ވަނަ ޤައުމެވެ. މީގެ ކުރިން ރާއްޖެއިން ވަނީ އެފްރިކާގެ މިސްރު، މޮރިޝަސް، ރުވާންޑާ، ސީޝެލްސް އަދި ސައުތު އެފްރިކާއާއެކުވެސް މިފަދަ އެއްބަސްވުންތައް ގާއިމުކޮށްފައެވެ. މިނިސްޓަރ ވިދާޅުވި ގޮތުގައި މި އެއްބަސްވުން ގާއިމުކުރެވިގެން މިދިޔައީ އެފްރިކާގައި އެންމެ ހަލުވިކަމާއެކު އިގްތިސާދު ކުރިއަރަމުން އަންނަ އެއް ޤައުމު ކަމަށްވާ އިތިއޯޕިއާގެ ޤައުމީ އެއާލައިން، އަދި އެ ބައްރުގެ އެންމެ ބޮޑު ވިއުގަ އޮތް އިތިއޯޕިއަން އެއާލައިންސް އިން އެ ޤައުމުގެ އެޑިސް އަބާބާއިން ރާއްޖެއަށް ސީދާ ދަތުރުތައް ފެށުމުގެ ޝައުގުވެރިކަން ފާޅުކޮށްފައިވާ ދަނޑިވަޅެއްގައެވެ.
މި އެއްބަސްވުމުގެ ސަބަބުން ދެ ޤައުމުގެ އެއާލައިންތަކުގެ މެދުގައި ޝެޑިއުލް ސީދާ ދަތުރުތައް ފެށުމުގެ މަގު ފަހިވެގެންދާނެއެވެ. އެގޮތުން އިތިއޯޕިއަން އެއާލައިންސްގެ ދަތުރުތަކުގެ އިތުރުން، ރާއްޖޭގެ ޤައުމީ އެއާލައިން "މޯލްޑިވިއަން" އަށްވެސް އިތިއޯޕިއާއަށް ދަތުރުތައް ކުރުމުގެ ފުރުސަތު ލިބިގެންދާނެއެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސިޔާސަތުގެ ދަށުން، ރާއްޖޭގެ އިގުތިސާދީ ފުދުންތެރިކަން އިތުރުކުރުމަށްޓަކައި ދުނިޔޭގެ އެކި ކަންކޮޅުތަކާ ރާއްޖެ ގުޅާލުމަށް ކުރެވޭ މުހިންމު މަސައްކަތެކެވެ. މީގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، ވިޔަފާރީގެ އައު ފުރުސަތުތައް ހުޅުވިގެންދާނެތީ، މި އެއްބަސްވުމުގެ މަންފާ އެންމެ ފުރިހަމައަށް ހޯދުމަށް ފަތުރުވެރިކަމުގެ ސިނާއަތުގެ ބައިވެރިންނަށާއި ވިޔަފާރިވެރިންނަށް މިނިސްޓަރ ވަނީ އިލްތިމާސް ކުރައްވާފައެވެ.