ރަސްގެފާނަށާއި ބޮޑުވަޒީރަށް ވަކިވަކިން ފޮނުއްވި މެސެޖުތަކުގައި ރައީސް މުޢިއްޒު ވިދާޅުވީ، މި ތާރީޚީ ކާމިޔާބީއަކީ ސްޕެއިން ޓީމުގެ މޮޅު ކުޅުމާއި، ހުނަރާއި، މަސައްކަތްތެރިކަން ހާމަވެގެންދިޔަ ކަމެއް ކަމަށެވެ. ފުޓުބޯޅައަކީ ދިވެހިންގެ މެދުގައި ނުހަނު މަޤުބޫލު ކުޅިވަރެއްކަން ފާހަގަކުރައްވަމުން، ރާއްޖޭގެ ގިނަ ބައެއްގެ މަޤުބޫލުކަން ހޯދާފައިވާ ސްޕެއިންގެ މި ކާމިޔާބީ މުޅި ރާއްޖޭގައި އުފަލާއެކު ފާހަގަކޮށްފައިވާ ކަމަށާއި، މީގެ ސަބަބުން ދެޤައުމުގެ ގުޅުން އިތުރަށް ބަދަހިވެގެންދާނެ ކަމަށް ރައީސް ވިދާޅުވިއެވެ.
މީގެއިތުރުން، ދެޤައުމުގެ ދެމެދުގައި އޮތް ބަދަހި ރަޙުމަތްތެރިކަމަށްޓަކައި ޝުކުރު އަދާކުރައްވައި، ރާއްޖޭގެ ފަތުރުވެރިކަން ކުރިއެރުވުމުގައި ސްޕެއިންގެ ފަތުރުވެރިންނާއި ބައިވެރިންގެ ފަރާތުން ލިބެމުންދާ އެހީތެރިކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ މެސެޖުފުޅު ނިންމަވާލައްވާފައިވަނީ ސްޕެއިންގެ ރަސްގެފާނަށާއި ބޮޑުވަޒީރަށް ދުޅަހެޔޮކަމަށް އެދިވަޑައިގަންނަވަމުން، އެޤައުމުގެ ރައްޔިތުންނަށް އަމާންކަމާއި، ފާގަތިކަމާއި ކުރިއެރުމަށް އެދިވަޑައިގަންނަވަމުންނެވެ.
