އިސްރާއީލުން ގާނޫނާ ޚިލާފަށް ހިފާފައިވާ ފަލަސްތީނުގެ ބިންތަކުގައި ނުވަތަ ސެޓްލްމަންޓްތަކުގައި އުފައްދާ މުދާ އެތެރެކުރުން ބެލްޖިއަމްގެ ފެޑެރަލް ސަރުކާރުން ރަސްމީކޮށް މަނާކޮށްފިއެވެ. ބެލްޖިއަމްގެ މީޑިއާތަކުން ރިޕޯޓްކޮށްފައިވާ ގޮތުގައި، މި ނިންމުން ނިންމާފައިވަނީ ހޫނު މޫސުމުގެ ޗުއްޓީއަށް ދިއުމުގެ ކުރިން ބޭއްވި ސަރުކާރުގެ ފަހު ކެބިނެޓް ބައްދަލުވުމުގައެވެ.
މިއީ އިސްރާއީލުން ޣައްޒާއަށް ދެމުންދާ ވަރުގަދަ ހަމަލާތަކާ ގުޅިގެން، އެ ގައުމުން މުދާ އެތެރެކުރުން ހުއްޓާލުމަށް މިދިޔަ އަހަރު ބެލްޖިއަމް ސަރުކާރުން ވެފައިވާ ވައުދާ އެއްގޮތަށް ނިންމި ނިންމުމެކެވެ. މިއާއެކު، ޔޫރަޕްގެ އިއްތިހާދު (އީޔޫ) ގެ ފެންވަރުގައި މިކަމަށް ވަކި ގޮތެއް ނުނިމި ލަސްވަމުންދާތީ، އަމިއްލައަށް އިސްނަގައިގެން އިސްރާއީލުގެ ސެޓްލްމަންޓް މުދާ މަނާކުރި ޔޫރަޕްގެ ގައުމުތަކުގެ ލިސްޓަށް ބެލްޖިއަމް މިވަނީ އިތުރުވެފައެވެ.
އިސްރާއީލަކީ ޔޫރަޕްގެ އިއްތިހާދުގެ އެންމެ ބޮޑު ވިޔަފާރި ބައިވެރިޔާއަށް ވާއިރު، އެ ގައުމުގެ މުޅި އެކްސްޕޯޓްގެ 30 އިންސައްތަ ހިއްސާކުރަނީ އީޔޫގެ ގައުމުތަކުންނެވެ. ނަމަވެސް، އީޔޫގެ 27 މެންބަރު ގައުމުތަކުގެ މެދުގައި އޮތް ބޮޑު ހިޔާލުތަފާތުވުންތަކުގެ ސަބަބުން، މުޅި އިއްތިހާދަށް ފެތުރޭ ފަދަ މަނާކުރުމެއް ގެނައުމަށް ވަނީ ހުރަސްތަކެއް ކުރިމަތިވެފައެވެ.
މި ހަފުތާގެ ކުރީކޮޅު ބްރަސަލްސްގައި ބޭއްވުނު ސިއްރު ބައްދަލުވުމެއްގައި، ބެލްޖިއަމްގެ ޚާރިޖީ ވަޒީރު މެކްސިމް ޕްރެވޮޓް ވަނީ މުޅި އީޔޫގައި މި ބޭން ހިންގުމަށް ބާރުއަޅުއްވާފައެވެ. ބެލްޖިއަމްގެ އިތުރުން ސްޕެއިން، ނެދަލޭންޑްސް އަދި އަޔަލޭންޑް ފަދަ ގައުމުތަކުން ވެސް ވަނީ އަމިއްލަ ގާނޫނުތަކުގެ ދަށުން މިފަދަ މުދާ އެތެރެކުރުން މަނާކޮށްފައެވެ.
"ގްލޯބަލް އީކޯ ލިޓިގޭޝަން ސެންޓަރު" އިން ކުރިއަށްގެންދިޔަ ތަހުގީގެއްގައި ހާމަވިގޮތުގައި، ޔޫރަޕަށް އެތެރެކުރާ ކޮންމެ 6 މުދަލަކުން 1 މުދަލަކީ ހިފާފައިވާ ހުޅަނގު އައްސޭރި ނުވަތަ ގޯލާން ހައިޓްސްގެ ސެޓްލްމަންޓްތަކުގައި އުފައްދާފައިވާ ތަކެއްޗެވެ. ނަމަވެސް، އިސްރާއީލުގެ އެކްސްޕޯޓަރުން ގަސްތުގައި އޭގެ އަސްލު އޮރިޖިން ފޮރުވައި، އާންމު އިސްރާއީލު މުދަލުގެ ގޮތުގައި އޮޅުވާލަމުންދާކަން ވަނީ ފާހަގަކުރެވިފައެވެ.
އިޓަލީގެ ކުރީގެ ބޮޑުވަޒީރު އެންރީކޯ ލެއްޓާ ހިމެނޭހެން ޔޫރަޕްގެ އިސް އޮފިޝަލުން ވިދާޅުވާ ގޮތުގައި، ވަކިވަކި ގައުމުތަކުން މިފަދަ ފިޔަވަޅުތައް އެޅި ނަމަވެސް، އީޔޫގެ އެހެން ގައުމަކުން ކަސްޓަމްސް ކްލިއަރެންސް ހަދައިގެން އެތެރެވާ މުދާ މިނިވަންކަމާއެކު ދައުރުވުމުގެ ފުރުސަތު އޮތުމުން މުޅި އިއްތިހާދުން އެއްގަލަކަށް އެރުން މުހިންމެވެ. މި ފިޔަވަޅުގެ އިތުރުން، ޣައްޒާގެ ހަނގުރާމައާ ގުޅިގެން ސްޕެއިން، އިޓަލީ އަދި ޖަރުމަނު ފަދަ ގައުމުތަކުން ދަނީ އިސްރާއީލަށް ހަތިޔާރު ވިއްކުން ވެސް ހަނިކުރަމުންނެވެ.