މާލެ ސަރަހައްދު ނޫން އެހެން ސަރަހައްދުތަކުގައި ބޯހިޔާވަހިކަން ފުޅާކުރުމަށް ސަރުކާރުން ކުރިއަށްގެންދާ "ނޭޝަނަލް އެފޯޑަބަލް ހޯމް އޯނަރޝިޕް ޕްރޮގްރާމް" ގެ ދަށުން، ރާއްޖޭގެ 13 ރަށެއްގައި 2,100 ހައުސިންގ ޔުނިޓް އިމާރާތްކުރާނެ ފަރާތްތަކެއް ހޯދަން ބިނާރާއި ގެދޮރުވެރިކަމާ ބެހޭ ވުޒާރާއިން އިއުލާނުކޮށްފިއެވެ. ޕަބްލިކް-ޕްރައިވެޓް ޕާޓްނަޝިޕް ނުވަތަ ޕީޕީޕީ އުސޫލުން ހިންގާ މި މަޝްރޫއަކީ ރާއްޖޭގެ ކޮންސްޓްރަކްޝަން ދާއިރާ ކުރިއެރުވުމަށްޓަކައި ހަމައެކަނި ސައްތައިން ސައްތަ ދިވެހި ކުންފުނިތަކަށް ބައިވެރިވެވޭ ގޮތަށް ހުޅުވާލާފައިވާ ފުރުސަތެކެވެ.
މި މަޝްރޫއުގެ ދަށުން އިމާރާތް ކުރުމަށް ހަމަޖެހިފައިވަނީ ތިން ކޮޓަރީގެ އެޕާޓްމަންޓްތަކެކެވެ. މީގެ އިތުރުން، މި އިމާރާތްތަކުގައި ޕާކް ކުރެވޭނެ އިންތިޒާމުތައް ހަމަޖެއްސުމާއެކު، އިމާރާތުގެ ގްރައުންޑް ފްލޯ ވިޔަފާރީގެ ބޭނުންތަކަށް ހާއްސަކޮށް ޖާގަ ހަދަންޖެހެއެވެ. މި މަޝްރޫއުތައް ހިންގުމަށް ބޭނުންވާ ބިން ސަރުކާރުން މުޅިން ހިލޭ ފޯރުކޮށްދޭ އިރު، ބިން ހަވާލުކުރާ ތާރީހުން ފެށިގެން ދެ އަހަރު ދުވަހުގެ ތެރޭގައި މަސައްކަތް އެއްކޮށް ނިންމައި ޔުނިޓްތައް ހަވާލުކުރަންޖެހެއެވެ .
ހައުސިންގ ޔުނިޓްތައް ބަހާލެވިފައިވާ ގޮތް:
- އައްޑޫ ސިޓީ: ޖުމްލަ 550 ޔުނިޓް (ހިތަދޫ - 300، ފޭދޫ - 200، މަރަދޫފޭދޫ - 25، މަރަދޫ - 25)
- ތިނަދޫ ސިޓީ، ފުވައްމުލައް ސިޓީ، ޅ. ނައިފަރު: ކޮންމެ ރަށަކަށް 300 ޔުނިޓް
- ލ. ގަން: 200 ޔުނިޓް
- ހއ. ހޯރަފުށި، ރ. އުނގޫފާރު، މ. މުލި، ދ. މީދޫ: ކޮންމެ ރަށަކަށް 100 ޔުނިޓް
- ބ. ތުޅާދޫ: 50 ޔުނިޓް
މި މަޝްރޫއަށް ހޮވޭ ޑިވެލޮޕަރުންނަކީ މާލީ ގޮތުން ގާބިލު، އަދި ޤައުމީ ބޯހިޔާވަހިކަމުގެ ސިޔާސަތުތަކާ އެއްގޮތަށް މަސައްކަތްކުރާނެ ފަރާތްތަކެއް ކަމަށް ވާންޖެހެއެވެ. މަޝްރޫއާ ގުޅޭގޮތުން އެއްވެސް މައުލޫމާތެއް ސާފުކުރަން ބޭނުންވާނަމަ، އަންނަ މަހުގެ 4 ވާ ދުވަހުގެ މެންދުރު 13:00 ގެ ކުރިން އީމެއިލް މެދުވެރިކޮށް ހުށަހެޅުމަށް މިނިސްޓްރީން ވަނީ އެދިފައެވެ.