ބަންގްލަދޭޝަށް ކުރިމަތިވަމުންދާ މޫސުމީ ވިއްސާރަ އާއި ބިންގަނޑު ކަނޑައިގެން ދިއުމުގެ ހާދިސާތަކާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ޤައުމަށް ތައުޒިޔާ ފޮނުއްވައިފިއެވެ.
ރައީސް ޑރ. މުއިއްޒުގެ އެކްސްގައި ކުރެއްވި ޕޯސްޓެއްގައި، ދިވެހި ސަރުކާރާއި ރައްޔިތުންގެ ނަމުގައި ބަންގްލަދޭޝްގެ ބޮޑުވަޒީރު މުހައްމަދު ތޯރިގް ރަހްމާނަށާއި އެ ޤައުމުގެ ސަރުކާރާއި ރައްޔިތުންނަށް ހަމްދަރުދީ އާއި ތައުޒިޔާ ވަނީ ރައްދުކުރައްވާފައެވެ.
އެމަނިކުފާނުގެ މެސެޖުގައި، މި ހާދިސާތަކުގައި ފުރާނަ ގެއްލުނު މީހުންގެ އާއިލާތަކަށާއި ގެއްލުން ލިބުނު އެންމެހާ ފަރާތްތަކަށް ހެޔޮ ދުއާ ފޮނުއްވައި، އަސަރުކުރި އާއިލާތަކަށް ކެތްތެރިކަމާއި އަވަސް ޝިފާއަކަށް އެދިވަޑައިގެންފައިވެއެވެ. އަދި މިފަދަ ދަތި ދަނޑިވަޅެއްގައި ރާއްޖެ އަބަދުވެސް ބަންގްލަދޭޝްއާ އެކު ސާބިތުކަމާއެކު އޮންނާނެ ކަމުގެ ޔަގީންކަން ވެސް ރައީސް ދެއްވިއެވެ.
ބަންގްލަދޭޝަށް ކުރިމަތިވި މި މޫސުމީ ވިއްސާރައިގައި ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން މިހާތަނަށް 44 މީހަކު ވަނީ މަރުވެފައެވެ.