ސަރުކާރުގެ އަމާޒަކީ ވީ އެންމެ އަވަހަކަށް މި އެއްބަސްވުމުގެ މަސައްކަތް ނިންމައި އަމަލުކުރަން ފެށުން ކަމަށްވާއިރު، މި އެއްބަސްވުމުގެ ދަށުން ރާއްޖޭގައި އުފައްދާ ބާވަތްތަކަށް އިންޑިއާގެ ބާޒާރުން ބޮޑެތި ލުއިތަކެއް ލިބިގެންދާނެއެވެ. ހާއްސަކޮށް އިމްޕޯޓް ޑިއުޓީ ކުޑަވުމާއި، ވިޔަފާރި ކުރުމުގައި ހުރި އެހެނިހެން ހުރަސްތަކާއި ގޮންޖެހުންތައް ނެތިގޮސް، ދެ ޤައުމުގެ ދެމެދުގައި ވިޔަފާރީގެ ގިނަ ފުރުސަތުތަކެއް ފަހިވެގެންދާނެ ކަމަށް ބައްދަލުވުމަށްފަހު މިނިސްޓަރު ސައީދު ކުރެއްވި އެކްސް ޕޯސްޓެއްގައި ވިދާޅުވެފައިވެއެވެ.
ރާއްޖެއާއި އިންޑިއާ ދެމެދު އެފްޓީއޭއެއް ގާއިމުކުރުމުގެ މަޝްވަރާތައް ކުރިއަށް ގެންދިޔުމަށް އެއްބަސްވުމެއްގައި ސޮއިކޮށްފައިވަނީ އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދަތުރުފުޅެއްގެ ތެރެއިންނެވެ. އޭގެ ފަހުން، މި އެއްބަސްވުމުގެ މަސައްކަތްތައް ކުރިއަށްގެންދާނެ އުސޫލުތައް ކަނޑައަޅާ ޓަރމްސް އޮފް ރިފަރެންސް (ޓީއޯއާރް) ގައި ދެ ޤައުމުން ސޮއިކޮށްފައިވަނީ މިއަހަރުގެ މާޗު މަހުގެ ތެރޭގައެވެ.
