ރަމަޟާން މަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސުލްޖުމްހޫރިއްޔާ ހަމަޖެއްސެވުމާ ގުޅިގެން މިމުއްދަތުގައި އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ޢާއްމުންނާ ވިޔަފާރިތަކަށް ދެމުން ގެންދާ ޚިދުމަތް މެދުނުކެނޑި ލިބޭނެ ގޮތް ހަމަޖައްސާފައިވާ ކަމުގައި އެ ވުޒާރާއިން ބުނެފިއެވެ.
މިގޮތުން އެ ވުޒާރާއިން ކުރި އިޢުލާނެއްގައި ބުނީ މި މުއްދަތުގައި ވަންގަވް އަދި ބިޒްނަސް ޕޯޓަލް މެދުވެރިކޮށް ހުށަހަޅާ އެޕްލިކޭޝަންތައް ޕްރޮސެސް ކުރެވޭނީ، ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 09:30 އިން 11:30 އަށް ކަމަށާއި، މި މުއްދަތުގެ ތެރޭގައި ޚިދުމަތަށް އެދެމުންދާ މިންވަރު އިތުރުވެއްޖެނަމަ، ޕްރޮސެސިންގ ޓައިމްތަކަށް ބަދަލު އަންނާނެ ކަމަށެވެ.
މީގެ އިތުރުން ވިޔަފާރިއާބެހޭ ޚިދުމަތްތަކަށް އެދެވޭނީ ވަންގަވް one.gov.mv ނުވަތަ ބިޒްނަސް ޕޯޓަލް business.egov.mv އިން ކަމަށާއި، ވިޔަފާރި ރަޖިސްޓްރީކުރުމާގުޅޭ ޚިދުމަތްތަކާބެހޭ މަޢުލޫމާތު ސާފުކުރެއްވުމަށް ލައިވް ޗެޓް ނުވަތަ ކޮންޓެކްޓް ސެންޓަރ 1500 އަށް ގުޅުއްވުމަށް އެ ވުޒާރާއިން ވަނީ އެދިފައެވެ.
އިޤުތިޞާދީ ވުޒާރާއިން ކުރި އިޢުލާނުގައިވާ ގޮތުން އީމެއިލް މެދުވެރިކޮށް މި މުއްދަތުގެ ތެރޭގައިވެސް ފޮރިން އިންވެސްޓްމަންޓް އެޕްލިކޭޝަން ފޯމް ހުށަޅޭނެއެވެ.
އަދި ފޮރިން އިންވެސްޓްމަންޓާ ބެހޭގޮތުން މަޢުލޫމާތު ހޯދުމަށް ނުވަތަ ހުށަހަޅާފައިވާ އެޕްލިކޭޝަނަކާއި ބެހޭގޮތުން މަޢުލޫމާތު ހޯދުމަށް، ހުކުރު އަދި ހޮނިހިރު ފިޔަވައި ކޮންމެ ދުވަހެއްގެ ހެނދުނު 09:30 އިން 11:30 އަށް 3333181 ނުވަތަ 3333182 އަށް ގުޅުއްވުމަށް އެ ވުޒާރާއިން އެދެއެވެ.
މީގެ އިތުރުން، ބައްދަލުކުރައްވަން ބޭނުންފުޅުވާ ފަރާތްތަކައް އޮންލައިން މީޓިންގ އިންތިޒާމް ހަމަޖެހޭނެ ކަމަށާއި، އޮންލައިން މީޓިންގ އެއް ހަމަޖެއްސެއްވުމަށް އީމެއިލް ކޮށްދެއްވުމަށްވެސް އެ ވުޒާރާއިން އެދިފައިވެއެވެ.
