ތިން ރަށެއްގެ ތިރީސް ދަނޑުވެރިއަކަށް ހައިޑްރޯޕޯނިކްސް ނިޒާމު ގާއިމުކޮށްދީ އެ ނިޒާމު ބޭނުންކޮށްގެން ދަނޑވެރިކަން ކުރުމަށް ބޭނުންވާ ތަމްރީނު ފޯރުކޮށްދީފައިވާކަމަށް ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ.މަރިޔަމް މާރިޔާ ވިދާޅުވެއްޖެއެވެ.
އެ ވުޒާރާގެ މަސައްކަތްތަކުގެ އެންމެ ފަހުގެ މައުލޫމާތު ހިއްސާކުރެއްވުމަށް ރައީސް އޮފީހުގައި އިއްޔެ ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައި ވަޒީރު ވިދާޅުވީ ހައިޑްރޮޕޯނިކްސް ޕްރޮގުރަމަކީ ކުޑަ ބިންކޮޅެއްގައި ޒަމާނީ އާލާތްތައް ބޭނުންކޮށްގެން ފަތްޕިލާވެއްޔާއި ތަރުކާރީގެ ބާވަތްތަައް އުފައްދުމަށް އެހީތެރިވުމުގެ ގޮތުން އެ ވުޒާރާއިން ކުރިއަށްގެންދާ ޕްރޮގުރާމެއް ކަމަށެވެ.
"މިއީ ޒަމާނީ ވަސީލަތްތައް ބޭނުންކޮށްގެން ކުޑަ ބިންކޮޅެއްގައި ފަތް ތަރުކާރީ އުފައްދައި ވިޔަފާރި އުސޫލުން މާކެޓުކުރުމަށް ކުރިއަށްގެންދާ ޕްރޮގުރާމެއް،" ވަޒީރު ވިދާޅުވިއެވެ.
ވަޒީރު ވިދާޅުވި ގޮތުގައި އެޕްރޮގުރާމު މިހާތަނަށް ހިންގާފައިވަނީ ތިން ރަށެއްގައެވެ. އެއީ ބ.ތުޅާދޫއާއި ފ.ދަރަބޫދޫއާއި އދ.އަމަދޫއެވެ. ވަޒީރު ވިދާޅުވީ އެއިން ކޮންމެ ރަށެއްގައި ދިހަ ދަނޑުވެރިންނަށް ހައިޑްރޯޕޯނިކްސް ނިޒާމު ފޯރުކޮށްދީ، އެ ނިޒާމު ބޭނުންކޮށްގެން ދަނޑުވެރިކަން ކުރުމަށް ބޭނުންވާ ތަމްރީނުތައްވެސް ދެވިފައިވާ ކަމަަށެވެ.
އޭގެ އިތުރަށް ވާޓިކަލް ފާމިންގެ ޕައިލެޓް ޕްރޮޖެކްޓެއް ހދ.ހަނިމާދޫގެ އެގްރިކަލްޗަރަލް ސެންޓަރުގައި ވާޓިކަލް ހައިޑްރޯޕޯނިކް ސިސްޓަމުގެ ތިން ބާވަތެއް ގާއިމުކޮށް އަޖުމަބަލައި ތަޖުރިބާކުރެވިފައިވާއިރު، އޭގެ ނަތީޖާއަށް ބަލައި ޖަޕާނާއި ޔޫއެންޑީޕީގެ އެހީގައި ޅ.ނައިފަރާއި، އއ.މަތިވެރިއާއި، ތ.ކިނބިދޫގައި ވާޓިކަލް ފާމިން ގާއިމުކުރުމުގެ މަސައްކަތް ކުރެވެމުންދާކަމަށް ޑރ.މާރިޔާ ވިދާޅުވިއެވެ.
