ފިލިޕީންސްގެ ދެކުނު އައްސޭރިފަށަށް 350 އަށްވުރެ ގިނަ ފަސިންޖަރުންނާއި ފަޅުވެރިންނާއެކު ދަތުރުކުރި ފެރީއެއް ބަންޑުން ޖަހާލައި އަޑިއަށްދިޔަ ހާދިސާގައި 18 މީހުން މަރުވެއްޖެއެވެ.
ފިލިޕީންސްގެ ކޯސްޓްގާޑުން މައުލޫމާތު ދޭ ގޮތުގައި، "އެމްވީ ޓްރިޝާ ކާސްޓިން 3" އިން ދަތުރުކުރި މީހުންގެ ތެރެއިން 317 މީހަކު މިހާތަނަށް ވަނީ ސަލާމަތްކުރެވިފައެވެ. ނަމަވެސް، އަދިވެސް 24 މީހަކު ވީނުވީއެއް ނޭނގި ވަނީ ގެއްލިފައެވެ.
މުދަލާއި ފަސިންޖަރުން އުފުލާ މި އުޅަނދު ދަތުރުކުރަމުން ދިޔައީ ދެކުނުގެ މިންޑަނާއޯ ރަށުން ޖޯލޯ ރަށަށެވެ. މި އުޅަނދަށް ދިމާވި ހާދިސާއާ ގުޅިގެން އެހީއަށް އެދި ސިގްނަލް ފޮނުވާފައިވަނީ އެގައުމުގެ ގަޑިން ހޯމަ ދުވަހުގެ 01:50 ގައެވެ.
ކަމާބެހޭ ފަރާތްތަކުން ބުނާ ގޮތުގައި މި ހާދިސާ ހިނގަން މެދުވެރިވި ސަބަބު ދަނީ ތަހުގީގު ކުރަމުންނެވެ.
7,100 އަށްވުރެ ގިނަ ރަށްތަކުގެ މައްޗަށް އެކުލެވޭ ޖަޒީރާ ގައުމެއް ކަމަށްވާ ފިލިޕީންސަކީ، ރަށްތަކުގެ މެދުގައި ދަތުރުކުރާ ފެރީތަކަށް މިފަދަ ނުރައްކާތެރި ހާދިސާތައް ކުރިމަތިވުމުގެ ދިގު ތާރީޚެއް އޮތް ގައުމެކެވެ.
އޭއެފްޕީން ރިޕޯޓްކޮށްފައިވާ ގޮތުގައި، ފިލިޕީންސް ކޯސްޓްގާޑުގެ ތަރުޖަމާނު ނޯމީ ކަޔަބްޔާބް ޓީވީ އިންޓަވިއުއެއްގައި ވިދާޅުވީ، ސަލާމަތްވި ބައެއް މީހުން ބުނި ގޮތުގައި އެ ވަގުތު އެ ސަރަހައްދުގެ ކަނޑު ވަރަށް ގަދަ ކަމަށެވެ.
ބޮންގާއޯ މުނިސިޕަލިޓީގެ ޑިޒާސްޓާ މެނޭޖްމަންޓް އޮފީހުން އާންމުކޮށްފައިވާ ވީޑިއޯއަކުން ފެންނަ ގޮތުގައި، މީހުން ސަލާމަތްކުރާ ފަރާތްތަކަށް އިންތިޒާރުކޮށްގެން، ލައިފް ޖެކެޓް އަޅައިގެން ތިބި ބަޔަކު ކަނޑުމަތީގައި ތިއްބެވެ.
އަދި ބަސިލަންގެ ގަވަރުނަރު މުޖީބު ހާތަމަން ފޭސްބުކްގައި ހިއްސާކުރެއްވި ވީޑިއޯއަކުން ފެންނަނީ، ސަލާމަތްކުރި މީހުން ރެސްކިއު ބޯޓުން ބާލާއިރު ފިނިން ރައްކާތެރިވުމަށް ފޮތިގަނޑު އޮޅައިގެން ތިބި މަންޒަރެވެ.
ބަސިލަންގެ އެމަޖެންސީ ރެސްޕޮންޑަރެއް ކަމަށްވާ ރޮނަލިން ޕެރޭޒް އޭއެފްޕީއަށް މައުލޫމާތު ދެމުން ބުނި ގޮތުގައި، ސަލާމަތްކުރި މީހުންގެ އަދަދު ގިނަވުމުގެ ސަބަބުން އެހީތެރިކަން ފޯރުކޮށްދިނުމުގައި ވަނީ ބޮޑެތި ގޮންޖެހުންތަކަކާ ކުރިމަތިވެފައެވެ.
"އެންމެ ބޮޑު ގޮންޖެހުމަކީ އެއްފަހަރާ ގެންނަ ބަލިމީހުންގެ އަދަދު ގިނަވުން. މިވަގުތު އަޅުގަނޑުމެންގެ މުވައްޒަފުން ވަރަށް މަދު،" ޕެރޭޒް ބުންޏެވެ.
އަދި އެހީތެރިކަން ފޯރުކޮށްދޭ އިތުރު މީހަކު ބުނި ގޮތުގައި، ގެއްލިފައިވާ މީހުންގެ އާއިލާތަކުން މިހާތަނަށް 100 އަށްވުރެ ގިނަ ފޯނު ކޯލު ވަނީ ލިބިފައެވެ.