ބޮޑެތި ދަރަނިތަކެއްގެ ތެރޭގައި އޮތް ޤައުމީ އެއާލައިން، މޯލްޑިވިއަން ހިންގުމަށް މި ސަރުކާރުން ގެނައި ބަދަލުތަކާއެކު ކުންފުނީގެ މާލީ ހާލަތު މުޅިން ބަދަލުވެ، ރަނގަޅުވާން ފަށާފައިވާ ކަމަށް ޓޫރިޒަމް އަދި ސިވިލް އޭވިއޭޝަން މިނިސްޓަރ މުހައްމަދު އަމީން ވިދާޅުވެއްޖެއެވެ.
މޯލްޑިވިއަންގެ އާ ސީޕްލޭން ޓާމިނަލް ހުޅުވަން ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ ވިދާޅުވީ، 2018 އިން 2023އާ ހަމައަށް އައިއިރު އެ ކުންފުނި އޮތީ ބޮޑު ދަރަންޏަކަށް ވެއްޓި، ސީޕްލޭން އޮޕަރޭޝަންތައް ހުއްޓި، ޚިދުމަތުގެ ކޮންޓްރެކްޓްތައް ގެއްލިގެން ގޮސްފައި ކަމަށެވެ. ނަމަވެސް 2023 ވަނަ އަހަރު ކުންފުނީގެ މެނޭޖްމަންޓަށާއި ހިންގުމަށް ގެނައި ބަދަލުތަކާއެކު، މިދިޔަ އަހަރުގެ ހިސާބުތަކުން ކުންފުނި މާލީގޮތުން ކޮޅަށްޖެހިފައިވާކަން ފެންނަން އޮތް ކަމަށް އެމަނިކުފާނު ފާހަގަކުރެއްވިއެވެ.
އެއާލައިންތަކަކީ ވަރަށް ކުޑަ ފައިދާއެއްގައި ހިންގާ ވިޔަފާރިތަކަކަށްވާތީ، އަމާޒުން ކައްސާލައިފިނަމަ ނުކުންނާނެ ހިތި ނަތީޖާ މޯލްޑިވިއަނުން ފެނިފައިވާކަން ފާހަގަކުރައްވައި މިނިސްޓަރ ވިދާޅުވީ، ޒިންމާ ރަނގަޅަށް އަދާނުކޮށްފިނަމަ އެއާލައިން ހިންގާ ކުންފުނިތައް މާ ގިނަ ދުވަހެއް ނުވެ ބަނގުރޫޓުވެދާނެ ކަމަށެވެ. މޯލްޑިވިއަން އުފެއްދީއްސުރެ އަމިއްލަ އާމްދަނީން ހަރަދުތައް ހަމަޖައްސައި، ސަރުކާރަށް ޑިވިޑެންޑްވެސް ދައްކަމުން ދިޔަ ކުންފުންޏެއް ކަމަށްވާއިރު، އާ ޓާމިނަލަކާއެކު އުމްރާނީ ގޮތުން ކަންކަން ރަނގަޅުވި ނަމަވެސް ކުންފުނި ހިންގުމުގައި އަބަދުވެސް ސަމާލުވާންޖެހޭނެ ކަމަށް މިނިސްޓަރ ވިދާޅުވިއެވެ.
މި ލިޔުން ކިޔާލުމުން
