ދަރިވަރުންގެ ކަންކަމުގައި އިންވެސްޓްކުރުމާއި ތައުލީމީ ފުރުސަތުތައް ފުޅާކުރުމަކީ، ފަރުދީ ކުރިއެރުމުގެ އިތުރުން، އަދަށް ވުރެ ތަނަވަސް، ހަމަހަމަކަން ގާއިމުވެފައި އޮތް ވިލުންވެރި ޤައުމެއްގެ މުސްތަޤުބަލު ބައްޓަންކޮށްދެނިވި ކަމެއްގެ ގޮތުގައި ރައީސުލްޖުމްހޫރިއްޔާ ވިދާޅުވެއްޖެއެވެ.
އެމްނިކުފާނު މިހެން ވިދާޅުވީ މިއަދު ފާހަގަކުރާ އިންޓަރނޭޝަނަލް ޑޭ އޮފް އެޑިއުކޭޝަންގެ މުނާސަބަތުގައި ސޯޝަލް މީޑިއާގައި ހިއްސާކުރެއްވި ޕޯސްޓުގައެވެ.
އެ މަނިކުފާނު ވިދާޅުވީ، ތަޢުލީމަކީ ގައުމީ ތަރައްޤީގެ އެންމެ މުހިންމު ތަނބުކަމުގައި ސަރުކާރުން ކަނޑައަޅާފައިވާ ކަމަށެވެ. މިދިޔަ ދެ އަހަރު ދުވަހުގެ ތެރޭގައި، ހިލޭ ފުރަތަމަ ޑިގްރީ ސްކީމްގެ ދަށުން 6,000 އަށްވުރެ ގިނަ ދަރިވަރުން ދަސްވެނިވެފައިވާ ކަމަށާއި އެ ދަރިވަރުންގެ ތަޢުލީމީ ލޯނަށް ބިލިއަނަކަށްވުރެ ގިނަ ރުފިޔާ ދޫކުރެވިފައިވާ ކަމަށް ވިދާޅުވިއެވެ.
އޭގެ އިތުރަށް، ދަރިވަރުންގެ ކުރިއެރުމަށް އިންވެސްޓްކޮށް، ތަޢުލީމީ ފުރުޞަތުތައް ފުޅާކުރުމަކީ ހަމައެކަނި އެ ކުދިންގެ މުސްތަޤުބަލު ބައްޓަންކުރުމެއް ނޫން ކަމަށާއި އެއީ ހަރުދަނާ ޤައުމެއް ބިނާކުރުމަށް ކުރެވޭ މުހިންމު މަސައްކަތެއް ކަމަށް ރައީސް ލިޔުއްވާފައިވެއެވެ.
ސުލްޙައާއި ތަރައްޤީގައި ތައުލީމު އަދާކުރާ ދައުރުގެ މުހިންމުކަން ބަޔާންކުރުމުގެ ގޮތުން، ކޮންމެ އަހަރެއްގެ ޖަނަވަރީ މަހުގެ 24 ވަނަ ދުވަސް ފާހަގަކުރަނީ އިންޓަރނޭޝަނަލް ޑޭ އޮފް އެޑިއުކޭޝަންގެ ގޮތުގައިއެވެ.
