ޑިމޮކްރެޓްސް ޓިކެޓްގައި ކައުންސިލް އިންތިޚާބަށް ވާދަކުރަން ހުޅުވާލައިފި

ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު 2026ގައި ވާދަކުރަން ބޭނުންވާ ދަ ޑިމޮކްރެޓްސްގެ މެމްބަރުންނަށް އެ ފުރުސަތު ހުޅުވާލައިފިއެވެ. ދަ ޑިމޮކްރެޓްސް އިން ނެރުނު ނޫސްބަޔާނެއްގައި ބުނީ، އެ ޕާޓީގެ އިންޓަރިމް ކޮމިޓީއިން އިލެކްޝަންސް ކޮމިޝަންސްއާ ބައްދަލުކޮށް، ލޯކަލް ކައުންސިލް އިންތިޚާބު 2026ގައި ވާދަކުރަން ބޭނުންވާ ދަ ޑިމޮކްރެޓްސްގެ މެމްބަރުންނަށް އެ ޕާޓީން ފޯރުކޮށްދޭންޖެހޭ މަޢުލޫމާތާއި ޕާޓީގެ އިދާރާއިން ކުރަންޖެހޭ ކަންކަމާގުޅޭ މަޢުލޫމާތު ހޯދައި، އެކަށީގެންވާ މިންވަރަށް ތައްޔާރުވެވިފައިވާކަމަށެވެ. އެ ޕާޓީން ބުނީ، ކުރިއަށްއޮތް ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރަން ބޭނުންވާ ދަ ޑިމޮކްރެޓިކްސްގެ މެމްބަރުންނަށް އެ ފުރުސަތު މިހާރު ހުޅުވާލާފައިވާކަމަށެވެ.

ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބު 2026 ގައި ޕާޓީ ޓިކެޓްގައި ވާދަކުރުމުގެ ފުރުޞަތު ހުޅުވާލުން. pic.twitter.com/u6UECGXS6X

— The Democrats (@TheDemocratsMV) January 18, 2026

ކުރިއަށްއޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރަން ބޭނުންވާ ފަރާތްތަކުން އެޕްލިކޭޝަނަށް ހުށަހަޅާނީ، my.elections.gov.mv ޕޯޓަލް މެދުވެރިކޮށް، އޮންލައިންކޮށް މަޢުލޫމާތު ހުށަހަޅުއްވައިގެންނެވެ. އަދި މިދިޔަ ޑިސެމްބަރުމަހުގެ 1ގެ ފަހުން ނާގަފައިވާ މުޅި އުމުރުގެ ކުށުގެ ރިކޯޑާއި، ދަރަނި ކްލިއަރެންސް ރިޕޯޓު އަޕްލޯޑު ކުރަންޖެހޭނެއެވެ. މިކަމާގުޅޭ އިތުރު މަޢުލޫމާތެއް ހޯއްދެވުމަށް އެ ޕާޓީގެ އީމެއިލްއެޑްރެސް we@thedemocrats.mv އަށް މެއިލްކުރެއްވުމަށް އެ ޕާޓީން އެދިފައިވެއެވެ. މި އިންތިޚާބުގައި ވާދަކުރެއްވުމަށް ޝައުގުވެރިވާ ޑިމޮކްރެޓްސްގެ މެމްބަރުންނަށް ޝައުގުވެރިކަން ފާޅުކުރެއްމަށް އީ ފޯމްލިންކެއް ފޯރުކޮށްދެވޭނެކަމަށް އެ ޕާޓީން ވިދާޅުވެއެވެ. މި ފޯމު ހުށަހެޅުމުގެ ސުންގަޑިއަކީ މިމަހުގެ 31އެވެ. އެއް ގޮނޑިއަށް ގިނަ ކެނޑިދޭޓުން ޝައުގުވެރިކަން ފާޅުކުރައްވައިފިނަމަ ޕާޓީގެތެރެއިން ޕްރައިމަރީއަކުން ކެންޑިޑަސީ ކަނޑައެޅޭނެކަމަށް އެ ޕާޓީން ބުނެއެވެ.