ޔުގެންޑާގެ ރައީސް ޔޮވެރީ މުސެވެނީ ހަތްވަނަ ދައުރަކަށް އިންތިޚާބުވެވަޑައިގެންފައިވާކަން އެގައުމުގެ އިލެކްޝަން ކޮމިޝަނުން ރަސްމީކޮށް އިޢުލާންކޮށްފިއެވެ.
އުމުރުފުޅުން 81 އަހަރުގެ މުސެވެނީ މި އިންތިޚާބު ކާމިޔާބުކުރެއްވީ ވޯޓުގެ 71.65 އިންސައްތަ ހޯއްދަވައިގެން ކަމަށް އެ ކޮމިޝަނުން ހާމަކޮށްފައިވެއެވެ. ރަސްމީ ނަތީޖާތަކުން ދައްކާ ގޮތުގައި، މުސެވެނީއާ އެންމެ ގާތުން ވާދަކުރެއްވި އުމުރުން 43 އަހަރުގެ ބޮބީ ވައިންއަށް ލިބިވަޑައިގަތީ ވޯޓުގެ 24.72 އިންސައްތައެވެ.
މުސެވެނީ މި އިންތިޚާބު ކާމިޔާބުކުރައްވާނެ ކަމަށް ކުރިންވެސް ބެލެވިފައި އޮތް ނަމަވެސް، މިއީ އިދިކޮޅު ފަރާތްތަކުގެ އެއްވުންތަކަށް ހުރަސްއަޅައި، ބިރުދެއްކުމާއި ފިއްތުންތަކުން ފުރިގެންވި ކެމްޕޭނަކަށްފަހު އައި ނަތީޖާއެއް ކަމަށް އދ. އިން ވަނީ ސިފަކޮށްފައެވެ. މީގެ އިތުރުން، ބުރާސްފަތި ދުވަހު ބޭއްވި މި އިންތިޚާބު ކުރިއަށްދިޔައީ މުޅި ގައުމުން އިންޓަނެޓްގެ ޚިދުމަތް ކަނޑާލާފައި އޮތް ވަގުތެއްގައެވެ. މިކަމާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ.
ލަވަކިޔުންތެރިއެއްގެ ގޮތުގައި މަޝްހޫރުވެފައިވާ، އަދި އަސްލު ނަމަކީ ރޮބަޓް ކިޔާގުލާނީ ކަމަށްވާ ބޮބީ ވައިން، ވޯޓުލީ ދުވަހު ސޯޝަލް މީޑިއާގައި ވިދާޅުވި ގޮތުން، ވޯޓު ފޮށިތަކަށް އޮޅުވާލައިގެން ގިނަ އަދަދަކަށް ވޯޓު ކަރުދާސް އަޅަމުންދިޔައެވެ. އަދި ފުލުހުންނާއި ސިފައިން އޭނާ ދިރިއުޅޭ ގެއަށް ވަދެ ރެއިޑްކުރި ވަގުތު ގޭ ދޫކުރައްވާ ވަޑައިގެންފައިވާ ކަމަށްވެސް ބޮބީ ވައިން ވިދާޅުވެފައިވެއެވެ.
"މިވަގުތު އަޅުގަނޑު ހުރީ ގޭގައެއް ނޫން. ނަމަވެސް އަޅުގަނޑުގެ އަންހެނުންނާއި އާއިލާގެ އެހެން މެންބަރުން ތިބީ ގޭބަންދުގައި. މި މުޖުރިމުން އަޅުގަނޑު ހޯދުމަށް ހުރިހާ ތަނެއް ބަލަމުންދާކަން އެނގޭ. އަދި އަޅުގަނޑު މިދަނީ ސަލާމަތްތެރިކަން ހޯދުމަށް ކުރެވެން ހުރި ހުރިހާ މަސައްކަތެއް ކުރަމުން،" އޭނާ ވިދާޅުވިއެވެ.
1986 ވަނަ އަހަރުން ފެށިގެން ވެރިކަން ކުރައްވަމުން ގެންދަވާ މުސެވެނީގެ މައްޗަށް، ސިޔާސީ އިދިކޮޅު ފަރާތްތަކަށް އަނިޔާވެރިވެ، އެފަރާތްތަކުގެ އަޑު ކަނޑުވާލުމަށް މަސައްކަތްކުރާ ކަމުގެ ތުހުމަތު ގިނަ އަހަރުތަކެއް ވަންދެން ވަނީ ކުރެވިފައެވެ.
މި ހަފުތާގެ ވޯޓުގެ ކުރިން މުސެވެނީ ވިދާޅުވެފައިވަނީ، 80 އިންސައްތަ ތާއީދާއެކު އޭނާ ފަސޭހަކަމާއެކު އިންތިޚާބު ކާމިޔާބު ކުރައްވާނެ ކަމަށް އުންމީދު ކުރައްވާ ކަމަށެވެ.