ކިންގްސް ކެޕިޓަލް ކުންފުނިން ހިންގި ސްކީމެއްގައި ބައިވެރިވެ، ފައިސާ އިންވެސްޓްކުރި މީހަކަށް ބަދަލު ދިނުމަށް، އެ ކުންފުންޏާއި އޭގެ ހިއްސާދާރުން ކަމަށްވާ އަލްހާން ފަހުމީ އަދި އޭނާގެ ކޮއްކޮ ޝަހުބާން ފަހުމީގެ މައްޗަށް ސިވިލް ކޯޓުން ހުކުމް ކޮށްފިއެވެ. މި ހުކުމްގައި ޖުމްލަ 587,466 ރުފިޔާ ދެއްކުމަށް ވަނީ އަންގާފައެވެ.
ބުރާސްފަތި ދުވަހު އިއްވި މި ހުކުމްގައި އަލްހާނާއި ޝަހުބާންގެ މައްޗަށް 587,466 ރުފިޔާ 15 ދުވަހުގެ ތެރޭގައި ދެއްކުމަށް ވަނީ ކަނޑައަޅާފައެވެ. މި ހުކުމް އިއްވާފައިވަނީ ދެ ބޭފުޅުންގެ ޣައިރު ހާޒިރުގައެވެ.
އަލްހާނާއި ޝަހުބާން އަދި ކިންގްސް ކެޕިޓަލް ކުންފުނީގެ މައްޗަށް އަމިއްލަ ފަރާތަކުން ސިވިލް ކޯޓުގައި ދައުވާކުރީ، އޭނާ ދެ ފަހަރެއްގެ މަތިން އިންވެސްޓްކުރި 120,000 ރުފިޔާ އާއި، އެ ފައިސާ އިންވެސްޓް ކޮށްގެން ލިބެންޖެހޭ ފައިދާގެ ގޮތުގައި ނުލިބިވާ 390,840 ރުފިޔާ ހޯދުމަށް ކަމަށް މައުލޫމާތު ލިބެއެވެ.
ޝަރީއަތް ހިންގުމަށް ތިން ފަހަރެއްގެ މަތިން އަލްހާނާއި ޝަހުބާން ކޯޓަށް ހާޒިރުވާން އަންގައި އިއުލާން ކުރި ނަމަވެސް، އެ އިއުލާނާ އެއްގޮތަށް އެ މީހުން ކޯޓަށް ހާޒިރުވެފައި ނުވާތީ، މައްސަލައިގެ ހުކުމް އިއްވާފައިވަނީ ޣައިރު ހާޒިރުގައެވެ.
ކިންގްސް ކެޕިޓަލްސްއިން ގިނަ ބައެއްގެ އަތުން ފައިސާ ނަގައިގެން ހިންގި އިންވެސްޓްމަންޓް ސްކީމްގެ މައްސަލާގައި އަލްހާނާއި އެ ކުންފުނީގެ ޑިރެކްޓަރުންގެ މައްޗަށް މީގެ ކުރިން ޖިނާއީ ތަހުގީގެއް ފުލުހުން ހިންގާފައިވެއެވެ. އެ މައްސަލަ ޕްރޮސެކިއުޓާ ޖެނެރަލް (ޕީޖީ) އޮފީހަށް ފުލުހުން ފޮނުވާފައިވަނީ ނޮވެމްބަރު 2023 ގައެވެ
