އަންނަ އަހަރު ސުކޫކަށް ދައްކަން ޖެހޭ 500 މިލިއަން ޑޮލަރު (7.7 ބިލިއަން ރުފިޔާ) ދައްކަން އިތުރު ބޮންޑެއް ވިއްކުމުގެ ބަދަލުގައި ވެލާނާ އިންޓަނޭޝަނަލް އެއާޕޯޓުގެ ހިއްސާ ވިއްކައިގެން އެ ފައިސާ ހޯދުމަކީ މާ ރަނގަޅު ގޮތެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ. ނަޝީދު މިހެން ވިދާޅުވެފައިވަނީ އެކްސް (ކުރީގެ ޓްވިޓާ) ގައި ކުރެއްވި ޕޯސްޓެއްގައެވެ.
ރޭ އެކްސްގައި ނަޝީދު ލިޔުއްވި ގޮތުގައި ސުކޫކު ދައްކަން ފައިސާ ހޯދުމަށް ސަރުކާރުން ދަނީ އެމެރިކާގެ ކާގިލް ފައިނޭންޝަލް ސާވިސް މެދުވެރިކޮށް ބޮންޑެއް ވިއްކުމަށް މަސައްކަތް ކުރަމުންނެވެ. ނަމަވެސް އެ ބޮންޑު ވިއްކޭނީ ވަރަށް މަތީ އިންޓްރެސްޓް ރޭޓެއްގައި ކަމަށް ނަޝީދު ލިޔުއްވި އެވެ. އެހެންކަމުން، މިކަމަށް އެހެން ގޮތަކަށް ވިސްނުމަށް ނަޝީދު ވަނީ އިރުޝާދު ދެއްވާފައެވެ.
ނަޝީދު ވިދާޅުވީ، "[ބޮންޑެއް ވިއްކުމުގެ ބަދަލުގައި] ވެލާނާ އެއާޕޯޓުގެ ހިއްސާގެ ބައެއް ވިއްކާލުމަށް ވިސްނާލުމަކީ ބުއްދިވެރި ކަމެއް ކަމަށް ވެދާނެ. އެ ފައިސާ ބޭނުން ކޮށްގެން ސުކޫކަށް ފައިސާ ދެއްކޭނެ، އޭރުން ރާއްޖޭން އަދާކުރަން ޖެހޭ ދަރަނީގެ ޒިންމާ ކުޑަވާނެ،" މިގޮތަށެވެ. މިއީ ދައުލަތުގެ ދަރަނި ކުޑަކުރުމަށް އެޅިދާނެ މުހިންމު ފިޔަވަޅެއް ކަމަށް އޭނާ ފާހަގަކުރެއްވިއެވެ.
ވެލާނާ އެއާޕޯޓުގެ މައްސަލަ ދިވެހިރާއްޖޭގެ ތާރީޚުގައި ވަނީ ގިނަ ބަހުސްތަކެއް އުފައްދާފައެވެ. އެމްޑީޕީގެ ފުރަތަމަ ވެރިކަމުގައި، އެއާޕޯޓު ތަރައްގީ ކުރުމަށް 25 އަހަރު ދުވަހުގެ އެއްބަސްވުމެއްގެ ދަށުން އިންޑިއާގެ ޖީއެމްއާރު ކުންފުންޏާ ހަވާލުކުރި އެވެ. އޭރު ރައީސަކަށް ހުންނެވީ ނަޝީދެވެ. ނަމަވެސް އޭރުގެ އިދިކޮޅު ކޯލިޝަނުން އެއާޕޯޓު ޖީއެމްއާރަށް ދިނުމަކީ ނަޝީދުގެ ސަރުކާރާ ދެކޮޅަށް ދެއްކި މައިގަނޑު އެއް ސަބަބެވެ.
ނަޝީދު އިސްތިއުފާ ދެއްވުމަށް ފަހު އައި މުހައްމަދު ވަހީދުގެ ސަރުކާރުން 2012 ވަނަ އަހަރުގެ ނޮވެމްބަރު މަހު އެ އެގްރީމެންޓު ބާތިލުކުރިއެވެ. އެގްރީމެންޓް ބާތިލުކުރުމުގެ ސަބަބުން ޖީއެމްއާރުން ވަނީ 1.4 ބިލިއަން ޑޮލަރު ދިވެހި ސަރުކާރުގެ އަތުން ހޯދުމަށް ސިންގަޕޫރުގެ އާބިޓްރޭޝަނަށް މައްސަލަ ހުށަހަޅާފައެވެ. އާބިޓްރޭޝަނުން ނިންމީ ދިވެހި ސަރުކާރުން 270 މިލިއަން ޑޮލަރު ދައްކަން ޖެހޭ ކަމަށެވެ. އެ ފައިސާގެ ބޮޑުބައެއް ދެއްކީ ދައުލަތުގެ ރިޒާވުންނެވެ.
1 ކޮމެންޓު
މި ވެސް ހަމަ އެއްޗެއް ނޫން