މޯލްޑިވްސް ޙައްޖު ކޯޕަރޭޝަންގެ ހަވާލުގައި މި ފެށޭ ނޮވެންބަރު މަހު ޢުމްރާއަށް ދާ ފަރާތްތައް ފުރަން ފަށައިފިއެވެ.
މިގޮތުން ޙައްޖު ކޯޕަރޭޝަންގެ ހަވާލުގައި ޢުމްރާއަށް ދާ ޢުމްރާވެރީންގެ ފުރަތަމަ ފުލައިޓު ވަނީ މިއަދު ފުރައިފައެވެ. މިއަދު 42 ޢުމްރާވެރީން ފުރާފައިވާއިރު، ޙައްޖު ކޯޕަރޭޝަންގެ ޢުމްރާވެރީންގެ ދެވަނަ ގްރޫޕް މާދަމާ ފުރާނެއެވެ. ދެވަނަ ބުރުގައި މޯލްޑިވިއަންގެ ފްލައިޓުގައި 122 ޢުމްރާވެރިއަކު ފުރުމަށް ހަމަޖެހިފައިވެއެވެ.
ޙައްޖު ކޯޕަރޭޝަނުން ވަނީ ނޮވެންބަރު ޢުމްރާގެ ބައިވެރިންނަށް ޚާއްޞަކޮށްގެން ރޭ ތަމްރީނު ބައްދަލުވުމެއްވެސް ބާއްވައިފައެވެ. މިއީ ޢުމްރާ ކުރާނެ ގޮތާއި، ދަތުރުމަތީގައި ސަމާލުކަންދޭންވީކަންކަން ތަފްސީލުކޮށް ހިއްސާކުރުމަށް ބޭއްވި ބައްދަލުވުމެކެވެ.
2013 ވަނަ އަހަރު އުފެއްދި ޙައްޖު ކޯޕަރޭޝަންގެ މައިގަނޑު އަމާޒަކީ ޙައްޖާއި ޢުމްރާއަށް ދާން ގަސްތުކުރާ ދިވެހި ރައްޔިތުންނަށް ރަނގަޅު ފެންވަރެއްގައި ލުއި ފަސޭހަކަމާއި އެކު މި މަތިވެރިއަޅުކަން އަދާކުރެވޭނެ އިންތިޒާމު ހަމަޖައްސައިދީ، ޙައްޖު އަދި ޢުމްރާގެ އަޅުކަން އަދާކުރުމުގެ ގަސްތުގައި ދުރާލައިރާވަިގެން ރައްކާކުރާ ފައިސާ އަމާނާތްތެރިކަމާއެކު ބަލަހައްޓާނެ އިތުބާރުހުރި ނިޒާމެއް ޤާއިމުކުރުމެވެ.
