ޑިއުޓީގައި ހުރި ފުލުހެއްގެ އަތުން ގަދަކަމުން އާލާތްތައް ނެގުމަކީ ސުލްހަވެރި ސިޔަސީ ހަރަކާތެއް ނޫން: އިޙްސާން

ޑިއުޓީގައި ހުންނަ ފުލުހެއްގެ އަތުން ގަދަކަމުން އާލާތްތައް ނެގުމަކީ ސުލްހަވެރި ސިޔާސީ ހަރަކާތެއްގެ ގޮތުގައި ނުބެލެވޭނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، ޢަލީ އިޙްސާން ވިދާޅުވެއްޖެއެވެ. ވަޒީރު މިހެން ވިދާޅުވީ މިރޭ އެކްސްގައި ކުރެއްވި ޕޯސްޓެއްގައެވެ.

Forcibly taking equipment from an on-duty police officer is not considered a peaceful political activity, as it involves coercive or violent actions that disrupt law enforcement duties. pic.twitter.com/k6a2DJYl9U

— Minister of Homeland Security & Technology (@min_mohst) October 3, 2025

މިގޮތުން ވަޒީރު ވިދާޅުވީ އެއީ ޤާނޫނު ތަންފީޒުކުރުމުގެ ވާޖިބުތަކަށް ހުރަސްއަޅާފަދަ މަޖުބޫރު ނުވަތަ އަނިޔާވެރި ޢަމަލުތަކެއް ހިމެނޭ ކަމެއް ކަމަށެވެ. ވަޒީރު މިހެން ވިދާޅުވިއިރު، ފުލުހުން ބުނީ އެމްޑީޕީން މިރޭ މާލޭގައި ކުރިއަށްގެންދާ އެއްވުމުގައި، ކުރިން ހުއްދަ ދެވިފައިވާ ރޫޓާ ޚިލާފަށް، މަޖީދީ މަގުން ކުރިއަށްދާން ފެށުމާ ގުޅިގެން، އެގޮތަށް ޢަމަލު ނުކުރުމަށް ތަކުރާރުކޮށް ނަސޭހަތްތެރިވެ އިންޒާރު ދީފައިވާނެ ކަމަށެވެ. ނަމަވެސް އެކަމަށް އިޖާބަ ނުދީ އެއްވުމުގެ ބައިވެރިން ފުލުހުންނާ ދިމާލަށް ގަލާއި ފެންފުޅި އުކައި، ފުލުހުންގެ އާލާތްތައް އަތުލަން މަސައްކަތްކޮށް، އަދި ފުލުހުންގެ ވާޖިބު އަދާކުރުމަށް ހުރަސްއަޅާފައިވާ ކަމަށެވެ. އެހެންކަމުން މި ޢަމަލުތައް ހިންގި ފަރާތްތަކާމެދު ޤާނޫނީ ފިޔަވަޅު އަޅާނެ ކަމަށް ފުލުހުން ބުންޏެވެ. އަދި ފުލުހުންގެ ވާޖިބު އަދާކުރުމަށް ހުރަސް ނޭޅުމަށްވެސް ފުލުހުން ވަނީ އެންމެހައި ފަރާތްތަކަށް ނަސޭހަތްތެރިވެފައެވެ.