އައްޑޫގެ އެންމެ ފުރަތަމަ ރިސޯޓުކަމަށްވާ ޝަންގްރިއްލާ މިއަހަރު ނިމުމުގެ ކުރިން ހުޅުވޭނެ ކަމަށް، ޓޫރިޒަމް މިނިސްޓްރީން މިއަދު ވިދާޅުވެއްޖެއެވެ.
ޓޫރިޒަމް މިނިސްޓްރީން މިއަދު ނެރުނު ބަޔާނެއްގައި ބުނީ މިއަހަރުގެ ޑިސެންބަރު 31 ގެ ކުރިން ޝަންގްރިއްލާ ހުޅުވަން ނިންމީ އެ ތަނުގެ މެނޭޖްމަންޓާ ސަރުކާރުން ވާހަކަ ދެއްކުމަށްފަހު އައްޑޫ ޕްރައިވެޓް ލިމިޓެޑުން އެއްބަސްވެފައިވާ ކަމަށެވެ.
މިވަގުތު މިނިސްޓްރީގެ މުވައްޒަފުންގެ ޓީމެއް ޝަންގްރިއްލާގެ ކޮޓަރިތަކާއި ފެސިލިޓީތަކުގެ ހާލަތު ދެނެގަތުމަށް އެ ތަނަށް ގޮސް ކުރަންޖެހޭ މަސައްކަތްތައް ކުރަމުން އަންނަ ކަމަށް ވެސް މިނިސްޓްރީން މައުލޫމާތުދެއެވެ.
މިނިސްޓްރީން ވަނީ ޝަންގްރިއްލާ އަކީ އައްޑޫ ސިޓީގެ އިޤްތިޞާދުގެ މުހިންމު ތަނބެއްގެ ގޮތުގައި ދިގު މުއްފަރެއް ވަންދެން ދެމިއޮތް ފަތުރުވެރިކަމުގެ މުހިއްމު މަންޒިލެއް ކަމަށެވެ. އަދި ރިސޯޓް ހުޅުވުން ވަގުތީގޮތުން ހުއްޓާލެވުނު ދުވަހާހަމައަށް، ޝަންގްރި-ލާ ވިލިނގިލިން ވަނީ އައްޑޫގެ ތަރައްޤީއަށާއި ގަމުގެ އެއަޕޯޓްގެ ކަނަކްޝަންތައް އުތުރުކުރުމުގައި މުހިއްމު ދައުރެއް އަދާކޮށްފައެވެ. އެ ރިސޯޓް ހުޅުވުމަކީ އައްޑޫ ސިޓީގެ އިޤްތިޞާދަށް އިތުރު ކުރިއެރުމާއި އާރޯކަމެއް ގެނެސްދެވޭނެކަމެކެވެ. މީގެ އިތުރުން، ދިވެހިރާއްހޭގެ ފަތުރުވެރިކަމުގެ ސިނާޢަތުގެ މަންފާ ޤައުމުގެ ހުރިހާ ސަރަހައްދަކަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކަށް ލިބޭ އިތުރު ކުރިއެރުމާއި އާރޯކަމެއް ގެނެސްދޭނެ ކަމެއް ކަމަށް މިނިސްޓްރީގެ ބަޔާނުގައިވެއެވެ.
އެހެންކަމުން ކުރިއަށް އޮތް ތިން މަސްދުވަހުގެ ތެރޭ ނިންމަން ޖެހޭ ހުރިހާ މަސައްކަތެއް ނިންމައި، މިއަހަރު ނިމުމުގެ ކުރިން ޝަންގްރިއްލާ ހުޅުވުމުން، އައްޑޫގައި ވަޒީފާގެ ފުރުސަތުތައް އިތުރުވެ، އެ ސިޓީގެ ފަތުރުވެރިކަން ކުރިއަރާނެ ކަމަށް މިނިސްޓަރު ވިދާޅުވިއެވެ.
ސަރުކާރުގެ 30 ޕަސެންޓު ހިއްސާ އޮންނަ، އައްޑޫގެ ފުރަތަމަ ރިސޯޓު ކަމަށްވާ ޝަންގްރިއްލާ މަރާމާތު ކުރަން ބަންދު ކުރީ ކޮވިޑް ބަލިމަޑުކަން ފެތުރުނު ފަހުން، 2020 ވަނަ އަހަރެވެ. އެ ފަހުން އެ ރިސޯޓް ނުހުޅުވި އެތައް ދުވަހެއް ވެފައިވާއިރު، އެކަމާ އައްޑޫ ސިޓީގެ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
މިދިޔަ ސަރުކާރުގެ ފަސް އަހަރުގެ ދައުރު ނިމެން އުޅެނިކޮށް، ޝަންގްރިއްލާ ރިސޯޓުގައި އޮންނަ ސަރުކާރުގެ ހިއްސާ ދޫކޮށްލުމަށް އެ ރިސޯޓު ހިންގާ ކުންފުންޏާ ލިޔުންތައް ހަވާލުކޮށްފައިވާ ކަމަށް އޭރުގެ ރައީސް އިބްރާހިމް މުހައްމަދު ޞާލިހު ވިދާޅުވިއެވެ.
ޝަންގްރިއްލާ ވިލިނގިލި ރިސޯޓް އެންޑް ސްޕާއަކީ 2009 ވަނަ އަހަރު އައްޑޫ އިންވެސްޓްމަންޓްސް ޕްރިވެޓްލިމިޓެޑް ލިމިޓެޑަށް ތަރައްޤީކޮށް ހިންގުމަށް ސަރުކާރުން ކުއްޔަށް ދޫކޮށްފައިވާ ރިސޯޓެކެވެ. މިގޮތުން މި ރިސޯޓް ބަންދުކުރުމުގެ ކުރިން 500 އަށް ވުރެ ގިނަ މުވައްޒަފުން ރިސޯޓްގައި ވަޒީފާއަދާކުރިއެވެ.
