ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ބޯޑަށް ދެ މެންބަރަކު ޢައްޔަންކޮށްފިއެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު އެކްސްގައި ކުރި ޕޯސްޓެއްގައި ބުނެފައިވާ ގޮތުން އެ ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ބޯޑުގެ މެންބަރު ކަމަށް ޢައްޔަންކޮށްފައިވަނީ މ. ލަންސިމޫގެ، އަޙްމަދު އަޒްޔާން ޙަމީދާއި ށ. މާއެނގޫދޫ، ކަރަންކާވިލާ، އާދަމް ބަދުރުﷲ އެވެ.
ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑްގެ ބޯޑު މެމްބަރުން އައްޔަނުކުރުން pic.twitter.com/6ZOV0yiBg6
— Privatization & Corporatization Board (@pcb_gov) September 18, 2025
ޕީސީބީން ވަނީ މި މަހުގެ 14 ވަނަ ދުވަހުވެސް އެ ކުންފުނީގެ ބޯޑަށް ތިން މެންބަރުން ޢައްޔަންކޮށްފައެވެ. މިގޮތުން އެ ކުންފުނީގެ މެނޭޖިންގ ޑިރެކްޓަރގެ މަޤާމަށް ޢައްޔަންކޮށްފައިވަނީ ވ. ފަޝާމަންޒިލް، ޑރ. ޝާހު މާހިރެވެ.
މީގެ އިތުރުން އެ ބޯޑުގެ މެންބަރުކަމަށް މ. ކުރެއްދޫގެ، ޢާއިޝަތު މުޙައްމަދާއި ފުލެޓު ނަންބަރު 10-3-1، ޝިބާނާ ޢަބްދުﷲ ދީދީ ވެސް ވަނީ ޢައްޔަންކޮށްފައެވެ.
"ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް" ގެ ނަމުގައި ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އުފެއްދެވީ 9 ސެޕްޓެންބަރު 2025 ގައެވެ.
މިއީ ޑޮކްޓަރީ ބޭހާއި، މެޑިކަލް ކޮންޒިއުމަބަލްސްއާއި، މެޑިކަލް އިކުއިޕްމަންޓް ގަނޑުކޮށް ގަނެ ދިވެހިރާއްޖެއަށް އެތެރެކުރުމުގެ މަސައްކަތް ފުޅާކޮށް، އެތަކެތި ރާއްޖޭގެ އެކި ހިސާބުތަކަށް ފޯރުކޮށްދިނުމުގެ އެންމެހައި މަސައްކަތް ކުރުމުގެ މަގުސަދުގައި އުފައްދަވައިފައިވާ ކުންފުންޏެކެވެ.