ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގެ މަސައްކަތްތަކަށް ބޭނުންވާ މުވައްޒަފުން ހޯދުމަށް ނިމިދިޔަ ހަފްތާ ބަންދުގައި ބޭއްވި ވޯކް-އިން އިންޓަރވިއުއަށް ވަރަށް ބޮޑު ތަރުޙީބެއް ލިބުނު ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީން ބުނީ 250 ވުރެ ގިނަ މީހުން ވޯކް-އިންޓަރވިއުގައި ފޯމު ހުށަހަޅާފައިވާ ކަމަށާއި، ޝަރުތު ހަމަވާ ފަރާތްތަކަށް ވަގުތުން އިންޓަވިއުކޮށް ޕްރެކްޓިކަލް ޓެސްޓް ނިންމާ ވަޒީފާއަށް މީހުން ނެގުމަށް ކުރަންޖެހޭ ހުރިހާ އިދާރީ މަސައްކަތްތައް ފުރިހަމަކޮށްފައިވާ ކަމަށެވެ. ވޯކް-އިން އިންޓަރވިއުގައި ބައިވެރިވެ ހުރިހާ މަރުހަލާތައް ނިންމާފައިވާ ފަރާތްތަކުގެ ތެރެއިން، މަޤާމުތަކަށް ހޮވޭ ފަރާތްތަކަށް އެންގުމާއި ވަޒީފާ ހަމަޖެއްސުމުގެ އިންތިޒާމްތައް މި ސެޕްޓެމްބަރު މަހުގެ ތެރޭގައި ކުރިއަށްދާނެ ކަމަށްވެސް އީސީން ބުންޏެވެ.
ވޯކް-އިން އިންޓަރވިއު އަށްފަހު މި މަޤާމުތަކަށް މުވައްޒަފުން ހަމަނުވާނަމަ، މި މަޤާމުތަކަށް އިޢުލާނުގައިވާ އަދަދަށް މުވައްޒަފުން ހަމަވަންދެން، 2025 ސެޕްޓެންބަރު 1 އިން ފެށިގެން ކޮންމެ 15 ދުވަހަކުން މަޤާމަށް ކުރިމަތިލާފައިވާ ފަރާތްތައް އިވެލުއޭޓްކޮށް މީހުން ނަގަމުން ދާނެ ކަމަށް އީސީން ބުންޏެވެ.
އީސީން ބުނީ އިންޓަރވިއު އަދި އިމްތިޙާނު 2025 ސެޕްޓެންބަރު 1 ން 2026 މާރިޗު 15 ގެ ނިޔަލަށް އިލެކްޝަންސް ކޮމިޝަން، މާލޭ ގައި އޮންނާނެ ކަމަށެވެ.
