ﷲ ދެއްވި ނިޢުމަތްތަކުގެ ތެރެއިން އެންމެ މުހިންމު އެއް ނިޢުމަތަކީ ކައިވެނީގެ ނިޢުމަތް ކަމަށާއި، މި ނިޢުމަތުގެ ފޮނި މޭވާއަކީ ޒަވާޖީ ހަޔާތުގެ ގުޅުމުން ވުޖޫދުވާ ޢާއިލާ ކަމަށާއި، ޢާއިލާއަކީ ދުނިޔަވީ ހަޔާތުގެ މުޑުވަކެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
މިއަދުގެ ޚުޠުބާގެ މައުޟޫޢަކީ "ރަނގަޅު ޢާއިލާއެއް ބިނާކުރުން"، މިއެވެ.
މިއަދުގެ ޚުޠުބާގައި ވިދާޅުވީ ޢާއިލާ ބަލިކަށިވެއްޖެ ނަމަ ދިރިއުޅުމުގެ ނިޒާމު ހަލާކުވެ، މުޖުތަމަޢުން އިންސާނިއްޔަތުކަން ނެތިދާނެ ކަމަށާއި، ޢާއިލާއަކީ ލޯތްބާއި އޯގާތެރިކަމުގެ މައްޗަށް ބިނާވެފައިވާ ޝަރުޢީ އަދި އިޖުތިމާޢީ ހިޔާވަހިކަމެއް ކަމަށާއި، ހަރުދަނާ ޢާއިލާއެއް ބިނާކުރުމަކީ މާތްﷲ ދެއްވި މި ބޮޑު ނިޢުމަތަށް ޝުކުރު ކުރުމަށް އެޅޭ ފުރަތަމަ ބިންގާ ކަމަށެވެ.
މީގެ އިތުރުން މިއަދުގެ ޚުޠުބާގައި ވިދާޅުވީ ޢާއިލާއެއް ބިނާކުރެވޭނީ އިސްލާމީ އަޤީދާގެ މަތީގައި މުޅި ދިރިއުޅުން އާރާސްތުކުރެވިގެން ކަމަށާއި، ޢާއިލީ ބިނާގެ އެންމެ މުހިންމު ދެ ތަނބު ކަމުގައިވާ މައިންބަފައިންނަކީ ތައުހީދާއި ތިމާއަށް ކޮންމެހެން ބޭނުންވާ ދީނީ ޢިލްމު އުނގެނި އެއަށް ޢަމަލުރާ ރިވެތި އަޚްލާޤުގެ ވެރި ބަޔަކަށް ވެގެން ކަމަށާއި، ދެމަފިރީންގެ ކިބައިން ދަރިންނަށް ރިވެތި މިސާލުތަކެއް ދައްކައިގެން ކަމަށެވެ.
މިއަދުގެ ޚުޠުބާގައި ވިދާޅުވެފައިވާ ގޮތުގައި ފަސާދައާއި މަގުފުރެދުމާއި ބައިބައިވުމާއި ހަމަނުޖެހުންތަކުން އިސްލާމީ އުންމަތް ސަލާމަތްކުރުމަށްޓަކައި ހަރުދަނާ އަޤީދާގެ މަތީގައި ދަރިން ތަރުބިއްޔަތުކުރަން ވަރަށް ބޮޑު އިސްކަމެއް ދޭން ޖެހިފައިވާ ކަމަށާއި، ދަރިންގެ ހިތްތަކުގައި އީމާންކަމުގެ އޮށް އިންދައި ތައުހީދުގެ ޢިލްމު އުނގަންނައިދިނުމަކީ ހަރުދަނާ ތަރުބިއްޔަތާއި ޢިލްމުތަކުގެ ކުރިބޯއްޓަށް ދަރިން ވާސިލުކޮށްދިނުމަށްޓަކައި ހުޅުވޭނެ އަމާން ދޮރެއް ކަމަށެވެ.
މިއަދުގެ ޚުޠުބާގައި އިތުރަށް ވިދާޅުވީ ހަރުދަނާ ޢާއިލާއެއް ބިނާކުރެވޭނީ ދީނާ ދުރު ފިކުރުތަކާއި ޢަމަލުތައް ގޭތެރޭގެ މާހައުލުން ނައްތާލެވިގެން ކަމަށާއި، އޭގެ ތެރޭގައި ދީނުގައި އަންގަވާފައިވާ މެދުމިނާ ދުރު ފިކުރުތަކާއި، ދީނަށް ޢަމަލު ނުކުރުމާއި، ދީނީ ޝިޢާރުތަކަށް މަލާމާތްކޮށް ހަޖޫޖެހުމާއި، ދީނުގެ މައްޗަށް ޣީރަތްތެރިކަން ނެތުން ފަދަ ކަންކަން ހިމެނޭ ކަމަށާއި، މި ކަންކަން ޢާއިލާގެ ތެރެއިން ނައްތާލައި، އިސްލާމް ދީނަކީ ޢަދުލުވެރި ދީންކަމާއި، މި ދީނަކީ ދިރިއުޅުމުގެ ސީދާ މަގުކަން ދަރިންނަށް ވިސްނައިދީ ނަފްސުތަކުގައި މި ކަންކަން ހަރުލައްވަންވާނެ ކަމަށެވެ.
އަދި ރަނގަޅު ޢާއިލާއެއް ބިނާކުރެވޭނީ ދަރިން ފުރާވަރަށް އެރުމުން ހުރިހާ ކަމެއް ހުއްދަވީ ކަމަށް ހީކުރާ ހީކުރުންތައް ދޫކޮށްލައިގެން ކަމަށާއި، އުޅޭނެހާ ގޮތަކަށް އުޅެން ދަރިން ދޫކޮށް ނުލައި އިސްލާމީ ޝަރީޢަތުގައި ކަނޑައަޅުއްވާފައިވާ އިމުން ބޭރުނުވެ، ހަޔާތުގެ ބައިވެރިޔާ އިޚްތިޔާރުކުރުމަށް ދަރިންނަށް އިރުޝާދު ދީގެން ކަމަށާއި، ރަނގަޅު ޢާއިލާއެއް ބިނާކުރެވޭނީ އިސްލާމީ އުސޫލުތަކުގެ މަތީގައި ޢާއިލާގެ އެންމެހައި މެންބަރުންގެ ޢަމަލުތައް ބަހައްޓައިގެން ކަމަށްވެސް މިއަދުގެ ޚުޠުބާގައި ވިދާޅުވެފައިވެއެވެ.
މި ލިޔުން ކިޔާލުމުން
