ވެލާނާ އިންޓަރނޭޝަނަލް އެއާޕޯޓު (ވީއައިއޭ) ގެ އައު ޕެސެންޖަރ ޓަރމިނަލުން ޚިދުމަތް ދޭން ފެށި ފުރަތަމަ ބޭރުގެ އެއާލައިނަކަށް އެއަރ އަރަބިއާ ވެއްޖެއެވެ.
މިގޮތުން އައު ޓަރމިނަލުން އެއަރ އަރަބިއާގެ އޮޕަރޭޝަންތައް ފަށާފައިވަނީ ޑިޕާޗަރ ސަހައްދުގައި ބޭއްވި ރިބަން ކެނޑުމުގެ ޚާއްޞަ ރަސްމިއްޔާތަކުންނެވެ.
A ceremonial ribbon-cutting marked the commencement of @airarabiagroup inaugural flight from Terminal 1, symbolizing the official launch of operations and celebrating a proud milestone in the airport’s history. pic.twitter.com/Tfg7lmNc0p
— Maldives Airports Company Ltd (@MACLmedia) August 13, 2025
އެއަރ އަރަބިއާއިން މިހާރު ރާއްޖެއަށް ދުވާލަކު އެއް ފަހަރު ދަތުރުކުރާއިރު، އަންނަ އޮކްޓޫބަރު މަހުގެ 27 ވަނަ ދުވަހުން ފެސިގެން ދުވާލަކު ދެ ދަތުރު އެ އެއާލައިނުން ރާއްޖެއަށް ކުރުމަށް ވަނީ ނިންމައިފައެވެ.
26 ޖުލައި 2025 ގައި ހުޅުވި ވީއައިއޭގެ އައު ޓަރމިނަލުން އެންމެ ފުރަތަމަ ޚިދުމަތް ދީފައިވަނީ މޯލްޑިވިއަންގެ އެއާބަސް އޭ330 މަތިންދާބޯޓަށެވެ.
ރާއްޖޭގެ ތާރީޚާއި ޘަޤާފަތާއި ދީނީ ތަރިކަ ރަމްޒުކޮށްދޭ ހިރިގަލުގެ ފަންނުވެރި ކެނޑުންތަކުން ފަރުމާކޮށްފައިވާ އައު ޓަރމިނަލްގައި، ރާއްޖޭގެ ހިތްގައިމު ކަނޑުގެ މަންޒަރުތަކާއި ޤުދުރަތީ ރީތި ރަށްތަކުގެ ނަލަކަމާއި ކުލަތައް ހިމަނާފައިވެއެވެ.
އައު ޓަރމިނަލުގައި 47 ޗެކިންގ ކައުންޓަރާއި، 6 ސެލްފް ސަރވިސް ކައުންޓަރާއި، 20 ޑިޕާޗަރ އިމިގްރޭޝަން ކައުންޓަރާއި 6 ޕެސެންޖަރ ބޯޑިންގ ގޭޓާއި 12 އޭރޯ ބްރިޖް ހުރެއެވެ. އަދި މި ޓަރމިނަލަކީ އަހަރެއްގެ މައްޗަށް 7 މިލިޔަން މީހުންނަށް ޚިދުމަތް ދެވޭ ފެންވަރަށް ތަރައްޤީކޮށްފައިވާ ޓަރމިނަލެކެވެ.
ވެލާނާ އިންޓަރނޭޝަނަލް އެއަރޕޯޓުގެ ކުރީގެ ޓަރމިނަލް ހުޅުވީ 1981 ވަނަ އަހަރުގައެވެ.
މި ލިޔުން ކިޔާލުމުން
