ފީނަން ގޮސް އުޅެނިކޮށް މާމިގިލިން ގެއްލުނު އުމުރުން 15 އަހަރުގެ ލޫޠު ބިން އަޙްމަދު ނިޔާވުމަކީ ހިތާމަވެރި ޚަބަރެއްގެ ގޮތުގައި ސިފަކުރެއްވުމާއެކު އޭނާގެ އާއިލާއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.
ރައީސްގެ ރަސްމީ އެކްސް އެކައުންޓުގައި ކުރެއްވި ޕޯސްޓުގައި އެމަނިކުފާނު ވިދާޅުވީ މޫދަށް ގޮސް އުޅެނިކޮށް އުމުރުން 15 އަހަރުގެ ކުޑަކުއްޖަކު ނިޔާވުމަކީ ހިތާމަވެރި، ނުތަނަވަސް އިހުސާސްތަކެއް ކުރުވި ކަމެއް ކަމުގައެވެ.
إِنَّا ِللهِ وَإِنَّآإِلَيْهِ رَاجِعُون މޫދަށް ގޮސް އުޅެނިކޮށް އުމުރުން 15 އަހަރުގެ ކުޑަ ކުއްޖަކު ނިޔާވުމަކީ، ހިތާމަވެރި، ނުތަނަވަސް އިޙްސާސްތަކެއް ކުރުވި ހިތްދަތި ޚަބަރެއް. އދ. މާމިގިލީގައި ރޭ ހިނގި މި ހިތާމަވެރި ހާދިސާގައި ނިޔާވި ލޫޠު ބިން އަޙްމަދަށް ސުވަރުގޭގެ ދާއިމީ…
— Dr Mohamed Muizzu (@MMuizzu) July 15, 2025
ރޭ އދ.މާމިގިލީގައި ހިނގި އެ ހާދިސާގައި ނިޔާވި ލޫޠު ބިން އަޙްމަދަށް ސުވަރުގޭގެ މަތިވެރި ނިއުމަތް މިންވަރުކޮށްދެއްވުން އެދިވަޑައިގެން ދުއާކުރެއްވުމާއެކު އެ އާއިލާއަށް މި ހިތްދަތި ވަގުތު ކެތްތެރިކަން މިންވަރުކުރެއްވުން އެދިވަޑައިގެން ރައީސް ދުއާކުރެއްވިއެވެ.
މި މަހުގެ 14 ވަނަ ދުވަަހުގެ މެންދުރު ވަގުތެއްގައި އދ.މާމިގިލި ކައިރިއަށް ފީނަން ގޮސް އުޅުނު ހަތަރު ކުދިންގެ ތެރެއިން ކުއްޖަކު ގެއްލިފައިވާ މައްސަލަ ފުލުހުންގެ ހިދުމަތަށް ރިޕޯޓުކުރީ އިއްޔެއެވެ.
ރޭ އިރާކޮޅު ހޯދަމުން އައި 15 އަހަރުގެ ކުއްޖާ ފެނުނީ އޭނާ ހޯދުމަށް ފީނަމުންދިޔަ އެމްއެންޑީއެފްގެ ޑައިވަރުންނަށެވެ.
