ދިވެހިރާއްޖެއިން ލަގްޒަމްބާގަށް ކަނޑައެޅުއްވި އައު ނޮން ރެސިޑެންޓް ސަފީރު ގީލާ ޢަލީ، އެކަމަނާގެ ސަފީރުކަމުގެ ފަތްކޮޅު ލަގްޒަމްބާގްގެ ހެރެޑިޓަރީ ގްރޭންޑް ޑިޔުކަށް އަރުވައިފިއެވެ.
މި ރަސްމިއްޔާތު އޮތީ އިއްޔެ ހެނދުނު ލަގްޒަމްބާގްގެ ގްރޭންޑް ޑިޔުކަލް ޕެލަސްގައެވެ.
ސަފީރުކަމުގެ ފަތްކޮޅު އެރުވުމަށްފަހު ގްރޭންޑް ޑިޔުކާއެކު ބޭއްވެވި ބައްދަލުވުމުގައި ސަފީރު ގީލާ ވަނީ ރައީސް ޑރ. މުޙައްމަދު މުޢިއްޒާއި ދިވެހި ރައްޔިތުންގެ ފަރާތުން ގްރޭންޑް ޑިޔުކަށް ހެޔޮއެދުމާއި ސަލާމް އަރުވައިފައެވެ. މީގެ އިތުރުން އެކަމަނާގެ ސަފީރުކަމުގައި ދެ ޤައުމުގެ ގުޅުން އިތުރަށް ވަރުގަދަކުރެއްވުމަށް މަސައްކަތްކުރައްވާނެ ކަމުގެ ޔަޤީންކަންވެސް ސަފީރު ވަނީ އަރުވައިފައެވެ.
މި ބައްދަލުވުމުގައި ސަފީރު ގީލާގެ އަރިހުގައި އެކަމަނާގެ ފިރިކަލުން ޢަބްދުﷲ މުޝްރިފް އަދި ދިވެހި އެމްބަސީގެ ފަސްޓް ސެކްރެޓަރީ، މުޙައްމަދު ޝައްފާޢު އިބްރާހީމް ބައިވެރިވެލެއްވިއެވެ.
