ކުޑަގިރީގައި ބޭއްވުނު މިއަހަރުގެ ޔޫތު ކޭމްޕް 65 ޒުވާނުންގެ ބައިވެރިވުމާއެކު ކާމިޔާބުކަމާއެކު ނިންމާލައިފިއެވެ. ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން އިންތިޒާމުކޮށްގެން ބޭއްވި މި ކޭމްޕަކީ އެއް ދުވަހުގެ މުއްދަތަށް ކުރިއަށް ގެންދެވުނު ކޭމްޕެކެވެ.
ކޭމްޕްގައި ބައިވެރިވި ފަރާތްތަކަށް ތަފާތު ގިނަ ކުޅިވަރުތަކާއި ދިރިއުޅުމުގައި ބޭނުންހިފޭނެ ތަފާތު ހުނަރުތައް ދަސްކޮށްދީފައިވާކަމަށް ވުޒާރާއިން މަޢުލޫމާތު ދެއްވިއެވެ. މީގެ އިތުރުން ކޭމްޕްގައި ބައިވެރިވި ހުރިހާ ފަރާތްތަކަށް ސެޓްފިކެޓް ދޫކޮށްފައިވެއެވެ.
ޔޫތު ކޭމްޕް ނިންމާލުމަށް ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން، ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ އަލީ ޝައްމާން ވިދާޅުވީ، މި ކޭމްޕުން ދަސްވި ފިލާވަޅުތަކުގެ ބޭނުން ބައިވެރިން ހިފާނެކަމަށް އުއްމީދުކުރައްވާ ކަމަށެވެ.
"ކުރިއަށް އޮތް ތާގައި މި ކޭމްޕްއިން ދަސްވި ފިލާވަޅުގެ ބޭނުން ދިރިއުޅުމުގައި ހިފަން ޖެހޭނެ. އެއީ މިކަހަލަ ކޮންމެ ޕްރޮގްރާމެއްގެ އެންމެ ބޮޑު އެއްބޭނުމަކީ،" ސްޓޭޓް މިނިސްޓަރ އަލީ ޝައްމާން ވިދާޅުވިއެވެ.
ކޭމްޕްގައި ބައިވެރިވި ފަރާތްތަކުން ފާހަގަކުރި ގޮތުގައި، މުޖުތަމަޢުގައި ބޭނުންކުރެވޭނެ ގިނަ ހުނަރުތަކެއް މި ކޭމްޕުން ދަސްވެގެން ދިޔައެވެ. އަދި ވަރަށް މަޖާ މާޙައުލެއްގައި ކުރިއަށްގެންދެވުނު މި ކޭމްޕުން ޓީމް ބިލްޑިންގ، ސެލްފް ޑިފެންސް އަދި ކޮމިއުނިކޭޝަން ސްކިލްތައް ވެސް ދަސްވެގެން ދިޔަކަމަށް ބައިވެރިން ފާހަގަކުރިއެވެ.
މި ލިޔުން ކިޔާލުމުން
