އޭޕްރީލް 18 ވަނަ ދުވަހު މާލޭގެ އިމާރާތަކުން ގުދަނެއްގެ ފުރާޅުމައްޗަށް ހައްވާ ޔުމްނު ރަޝީދު ވެއްޓުނު މައްސަލައިގައި ހައްޔަރުކުރި ރައުދު އަހުމަދު ޒިލާލަށް ދައުވާކޮށްދޭން އެދި ޕްރޮސެކިއުޓަ ޖެނެރަލް (ޕީޖީ) އޮފީހަށް ފުލުހުން މައްސަލަ ފޮނުވައިފި އެވެ.
ޕީޖީ އޮފީހުން ވެސް އަދި ފުލުހުންވެސް ވަނީ މިކަން ކަށަވަރުކޮށްދެއްވާފައެވެ. ނަމަވެސް އޭނާއަށް ދައުވާކޮށްދޭން އެދޭ މައްސަލައިގެ ތަފުސީލެއް ހާމައެއް ނުކުރެއެވެ.
ގާނޫނުގައިވާ ގޮތުގެ މަތިން ޕީޖީ އޮފީހަށް ފޮނުވާ މައްސަލައިގައި 15 ދުވަހުގެ ތެރޭގައި ދައުވާކުރުމާ މެދު ގޮތެއް ނިންމާނެއެވެ.
ރައުދަކީ ޔުމްނު ވެެއްޓުނު އިރު އޭނާއާ އެކު ބުރުޒުމަގުގައި ހުންނަ ހ. ފެންޓެނޯއީ ގޭގެ ސިޑިމަތީގައި އުޅުނު ޒުވާނާ އެވެ. ޔުމްނު ވެއްޓުނީ އޭނާއާ އެކު އެ ގޭގެ ތެރޭގައި އުޅުމުގެ ތެރޭގަ އެވެ.
މިދިޔަ މަހު ހ. މިޓާޒްގޭގެ ފުރާޅުން ވެއްޓުނު ހައްވާ ޔުމްނު ރަޝީދު (21) ގެ މައްސަލައިގައި ތުހުމަތުކުރެވޭ ރައުދު އަހްމަދު ޒިލާލް މިމަހު 22 ވަނަ ދުވަހު ހެނދުނު ބަންދުން ދޫކޮށްލުމަށްފަހު، އަނެއްކާވެސް ހައްޔަރުކުރިއެވެ.
ޔުމްނު ހޭއެރި ފަހުން ހާދިސާ ހިނގި ގޮތް އާއިލާއަށް ކިޔައިދިން ކަމަށް ބުނެ އާއިލާއިން މައުލޫމާތުތަކެއް ހިއްސާކުރިއެވެ.
ނަމަވެސް ޔުމްނުގެ ބަޔާން ނެގުމަށް ފުލުހުންނަށް އާއިލާއިން އެއްބާރުލުން ނުދޭ ކަމަށް ފުލުހުން ވަނީ ހާމަކޮށްފައެވެ. އެހެންވެ ޔުމްނުގެ ބަޔާން ނެގުމަށް މެލޭޝިއާ ފުލުހުންގެ އެހީތެރިކަން ހޯދުމަށް ފުލުހުން ދަނީ މަސައްކަތް ކުރަމުންނެވެ.
ޔުމްނުއަށް އިންސާފު ހޯދައި ދޭން އެދި ޒުވާނުން ވަނީ މުޒާހަރާވެސް ކުރިއެވެ.
