ސަރުކާރުން މި އަހަރުގެ ރޯދަމަހުގެ ހަދިޔާގެ ގޮތުގައި ބަހަމުންދާ މަސްދަޅު ކޭސް މިހާތަނަށް މުޅި ރާއްޖޭގެ 111،808 އަށްވުރެ ގިނަ ގޭބީސީތަކަށް މަސްދަޅު ކޭސް ބަހައިފިއެވެ. މީގެ ތެރޭގައި އަތޮޅުތެރޭގެ 61،099 ގޭބީސީއާއި މާލޭގެ 49،899 ގޭބީސީ ހިމެނެއެވެ.
"ރައްޔިތުންނާއެކު" ޕޮޑްކާސްޓްގައި ވާހަކަފުޅު ދައްކަވަމުން ރައީސް ޑރ. މުހައްމަދު މުއިއްޒު ވިދާޅުވި ގޮތުގައި، ރާއްޖެއަކީ 100 އިންސައްތަ މުސްލިމު ޤައުމަކަށްވާތީ، ރޯދަމަހަކީ ވަރަށް އިސްކަންދޭންޖެހޭ މައްސަރެކެވެ. އެގޮތުން މިދިޔަ އަހަރުގެ ރޯދަމަހު ފުރަތަމަ ފަހަރަށް ކަރަންޓާއި ފެން ބިލުން ދެއްވި ޚާއްސަ ލުޔެއް މި އަހަރުވެސް ދެމެހެއްޓެވި ކަމަށް ވިދާޅުވިއެވެ.
"މިދިޔަ އަހަރު ކޮންމެ ގޭބީސީއަކަށް ދިނީ ހަނޑޫ ބަސްތާ. މި ފަހަރު ހަމަޖެއްސީ މަސްދަޅު ކޭސް. މަސްދަޅު ވަރަށް ބޮޑަށް ބޭނުންކުރާނެ ރޯދަ މަހުގައި. އެއީ ވަރަށް އަގު ވެސް ބޮޑު އެއްޗެއް. އެހެންވީމަ 48 ދަޅުގެ ކޭހެއް ކޮންމެ ގެއަކަށް ދޭގޮތަށް. އެކަން ވަރަށް ރަނގަޅަށް ހަމަޖެހިގެން ދިޔަ،" ރައީސް މުއިއްޒު ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި، މަސްދަޅު ކޭސް ބެހުން ފެށިގެން ދިޔައީ ވަރަށް ފޯރިގަދަކޮށެވެ. މާލޭގައި ކުޑަކޮށް ހަލަބޮލިވި ނަމަވެސް، އެކަން ހައްލުކޮށް ފަހުން މާލޭގައިވެސް މަސްދަޅު ކޭސް ބެހުމުގެ ކަންކަން ކުރިއަށް ދިޔައީ އަދިކުރިއަށް ދާނީވެސް ހަމަޖެހޭ އަމާން ގޮތެއްގައެވެ.
މިހާތަނަށް މަސްދަޅު ކޭސް ނުގެންދެވި ތިބި ފަރާތްތަކަށް، ބޭނުން ވަގުތެއްގައި ގޮސް މަސްދަޅު ކޭސް ގެންދެވޭނެ އިންތިޒާމު ހަމަޖެހިފައިވާ ކަމަށް ރައީސް މުއިއްޒު ވިދާޅުވިއެވެ.
މި ލިޔުން ކިޔާލުމުން
