މާލެ އާއި ހުޅުމާލޭގައި ދުވާލަކު ކަރަންޓު ބޭނުންކުރާ މިންވަރު، ރަމަޟާން މަހުގެ ފުރަތަމަ ހަތް ދުވަހާ އަޅާބަލާއިރު އިތުރުވެފައިވާ ކަމަށް ސްޓެލްކޯއިން މިއަދު ހާމަކޮށްފިއެވެ. އަދި ކުރީގެ ހަތް ދުވަހެކޭ އެއްފަދައިން، އެއް ގަޑިތަކެއްގައި ކަރަންޓު ބޭނުންކުރާ މިންވަރު މަތިވެފައިވާތީ، ކަރަންޓު އިޤްތިޞާދުކުރުމަށް ސަމާލުކަން ދިނުމަށް އިލްތިމާސްކޮށްފައިވެއެވެ.
ސްޓެލްކޯއިން ޚިދުމަތްދޭ 33 ރަށުގައި ރޯދަމަހާއި ޕީކް ސީޒަނަށް ތައްޔާރުވުމުގެ މަސައްކަތް ވަނީ ކުރެވިފައެވެ. މި އަހަރުގެ ރޯދަމަހު ސްކޫލްތަކާއި އޮފީސްތައް ފަހު 10 ގައި ބަންދުވުމާއެކު ޕީކް ނުފެށުނު ނަމަވެސް، ރޯދަމަސް ނިމި ހޫނު މޫސުމާއެކު ޕީކް ސީޒަން ފެށޭނެކަމަށް ލަފާކުރެވެއެވެ.
ސްޓެލްކޯއިން ހާމަކުރިގޮތުގައި، މިއަހަރުގެ ޕީކް ސީޒަނަށް ތައްޔާރުވުމުގެ ގޮތުން ސްޓެލްކޯއިން ވަނީ ގިނަ މަސައްކަތްތަކެއް ކޮށްފައެވެ.
ދުރު މުސްތަޤުބަލަށް ވިސްނައި، ޕީކް ސީޒަންގައި ޖެނެރޭޝަން ކެޕޭސިޓީގެ ދަތިކަމުން ކަރަންޓު ނުކެނޑޭނެ ކަމުގެ ޔަޤީންކަން ސްޓެލްކޯއިން ވަނީ ދީފައެވެ. މިގޮތުން ހުޅުމާލޭގައި ޤާއިމުކުރި ބެކަޕް އިންޖީނުގެ ވަނީ ހުޅުވާފައެވެ.
ސްޓެލްކޯއިން ރައްޔިތުންނަށް އިލްތިމާސްކުރައްވާފައިވަނީ ކަރަންޓު އިޤްތިޞާދުކުރުމަށް އިތުރަށް ސަމާލުކަން ދިނުމަށެވެ. ޚާއްޞަކޮށް ކަރަންޓު ބޭނުންކުރާ މިންވަރު މަތިވާ ގަޑިތަކުގައި ކަރަންޓު ބޭނުންކުރުމުގައި ސަމާލުވުމަށް އެދިފައިވެއެވެ.
