ފަތުރުވެރިކަމާއި ތިމާވެއްޓާ ބެހޭ ވަޒީރު، ޠާރިޤް އިބްރާހީމް، ދުނިޔޭގެ އެންމެ ބޮޑު އެއް ޓޫރިޒަމް ފެއަރ ކަމުގައިވާ އައި.ޓީ.ބީ ބަރލިން 2025 ގައި ބައިވެރިވެ ވަޑައިގަތުމަށް އިއްޔެގެ ވަގުތެއްގައި ޖަރުމަނުވިލާތަށް ވަޑައިގަންނަވައިފިއެވެ.
ފަތުރުވެރިކަމާއި ތިމާވެއްޓާ ބެހޭ ވުޒާރާއިން ހާމަކޮށްފައިވާ ގޮތުގައި މި ދަތުރުފުޅުގައި ވަޒީރު ޠާރިޤް، އައި.ޓީ.ބީ ބަރލިންގައި ރާއްޖޭގެ ޓޫރިޒަމް ޕްރޮމޯޓް ކުރެއްވުމުގެ އިތުރުން، ރާއްޖޭގެ އަދި ބޭރުގެ ޓޫރިޒަމް ދާއިރާގެ އިސް ފަރާތްތަކާ ބައްދަލުކުރައްވާ މަޝްވަރާކުރައްވާނެއެވެ.
އައި.ޓީ.ބީ ބަރލިންގައި ބައިވެރިވާ ރާއްޖޭގެ ޓީމުން މަސައްކަތް ކުރައްވާނީ ރާއްޖެއަކީ ދުނިޔޭގެ އެންމެ ކުރީ ސަފުގައިވާ ޓޫރިސްޓް މަންޒިލެއްގެ ގޮތުގައި ޕްރޮމޯޓް ކުރެއްވުމަށާއި، ބައިނަލްއަޤްވާމީ ފެންވަރުގައި ޓޫރިޒަމް ދާއިރާގެ ގުޅުންތައް ބަދަހިކުރެއްވުމަށެވެ.
ވަޒީރުގެ މި ދަތުރުފުޅަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށާއި، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މުހިންމު ދައުރެއް އަދާކުރާނެ ދަތުރުފުޅެއް ކަމަށް ބެލެވެއެވެ. އައި.ޓީ.ބީ ބަރލިންގައި ރާއްޖެ ތަމްސީލުކުރެއްވުމުން، ރާއްޖޭގެ ފަތުރުވެރިކަމުގެ ސިނާއަތަށް އިތުރު ކުރިއެރުންތަކެއް ލިބިގެންދާނެ ކަމަށް އުއްމީދު ކުރެވޭ ކަމަށް އެ ވުޒާރާއިން ބުނެއެވެ.
