ޒަކާތު ހައުސަށް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް ޤާއިމްކުރަނީ

ޒަކާތު ހައުސަށް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް ޤާއިމްކުރުމަށް ނިންމައިފިއެވެ. އިސްލާމީ ކަންތައްތަކާ ބެހޭ ވުޒާރާއިން ބުނީ ދިވެހިރާއްޖޭގެ ޒަކާތު ހައުސަށް މުދަލު ޒަކާތުގެ ފައިސާގެ އިތުރުން ޞަދަޤާތައި ޚައިރަތާއި ހިބައާއި މި ނޫން ވެސް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް އަންނަ ހަފުތާގައި ޤާއިމު ކުރެވިގެންދާނެ ކަމަށެވެ.

ދިވެހިރާއްޖޭގެ ޒަކާތު ހައުސްއަށް މުދަލު ޒަކާތުގެ ފައިސާގެ އިތުރުން ޞަދަޤާތައި ޚައިރަތާއި ހިބައާއި މި ނޫން ވެސް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް އަންނަ ހަފްތާގައި ޤާއިމު ކުރެވިގެންދާނެ. pic.twitter.com/iC8oXjzH1X

— Ministry of Islamic Affairs (@MVIaffairs) February 20, 2025

އެ ވުޒާރާއިން ހާމަކުރާ ގޮތުގައި މީގެ ބޭނުމަކީ ރާއްޖޭގެ ރައްޔިތުން ހެޔޮކަންކަމަށް ކުރާ ހޭދަ ރާއްޖޭގައި ބޭނުންޖެހިފައިވާ ދާއިރާތަކަށް ހޭދަކުރުމުގެ ނިޒާމެއް އުފެއްދުމެވެ. ހެޔޮކަންކަމަށް ހޭދަކުރުމުގެ ޙާޖަތު ރާއްޖޭގައި ވަރަށް ބޮޑަށް އޮތް ހިނދު، ރާއްޖޭގެ މުޖުތަމަޢު ހެޔޮ ގޮތުގައި ބިނާކުރަން އިސްކަން ދިނުން މުހިންމު ކަމަށް އެ ވުޒާރާއިން ބުނެއެވެ. މީގެ އިތުރުން ވަރަށް ގިނަ ރަށްރަށަށް މިސްކިތްތަކާއި ޤުރުއާން ކްލާސްތަކާއި އެތަންތަނަށް ބޭނުންވާ ވަސީލަތްތައް ހޯދަންޖެހިފައިވާ ކަމަށާއި، ރާއްޖޭގެ ޒަކާތު ހައުސް ތަރައްޤީ ކުރަމުން ދަނީ އިސްލާމީ ދުނިޔޭގެ ނަމޫނާ ޒަކާތުގެ އިދާރާއެއް ކަމުގައިވާ ކުވޭތު ޒަކާތު ހައުސް ނަމޫނަ އަކަށް ބަލައިގެން ކަމަށް އެ ވުޒާރާއިން ވަނީ ބުނެފައެވެ.