ރައީސް ޑރ. މުޙައްމަދު މުޢިއްޒު، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަދި މިނިސްޓްރީ އޮފް ޓޫރިޒަމް އެއްކޮށްލައްވައި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓްގެ މަޤާމަށް ޢައްޔަންކުރެއްވި ޠާރިޤު އިބްރާހީމަށް ރައްޔިތުންގެ މަޖިލީހުން ރުހުން ދީފިއެވެ.
މިކަމަށްޓަކައި މިއަދު މަޖިލީހުގައި ނެގި ވޯޓުގައި ޠާރިޤަށް ރުހުން ދޭން ފާސްވީ ވޯޓުގައި ބައިވެރިވެވަޑައިގެންނެވި 69 މެންބަރުންގެ އިއްތިފާޤުންނެވެ.
މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ އަދި މިނިސްޓްރީ އޮފް ޓޫރިޒަމް އެއްކޮށްލައްވައި، މިނިސްޓަރ އޮފް ޓޫރިޒަމް، އެންޑް އެންވަޔަރަންމަންޓްގެ މަޤާމަށް ޠާރިޤު އިބްރާހީމް ޢައްޔަންކުރެއްވީ މި މަހުގެ އެއްވަނަ ދުވަހުއެވެ.
ރައީސް ކެބިނެޓަށް މިއަދު މި ބަދަލު ގެންނެވީ، ފަތުރުވެރިކަމާ ބެހޭ ވަޒީރުގެ މަޤާމުގައި ހުންނެވި އިބްރާހީމް ފައިޞަލް އެ މަޤާމުން ވަކިކުރެއްވުމާ ގުޅިގެންނެވެ.
ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲގެ ދަރިކަލުން ފައިޞަލް އަކީ ބިޒްނަސް މެނޭޖްމަންޓްގެ ދާއިރާއިން ތަޢުލީމު ހާސިލުކުރައްވާފައިވާ ބޭފުޅެކެވެ. އޭނާ ފަތުރުވެރިކަމާ ބެހޭ ވުޒާރާއަށް ޢައްޔަންކުރެއްވުމާ ގުޅިގެން ރައްޔިތުންގެ ފާޑުކިޔުންތައް ސަރުކާރަށް ވަނީ ވަރަށް ބޮޑަށް އަމާޒުވެފައެވެ. އަދި އޭނާ އެ މަޤާމަށް ޢައްޔަންކުރެއްވީ ޢަބްދުއްރަޙީމްގެ ދަރިކަލުން ކަމަށްވާތީ ކަމަށްވެސް ވަނީ ތުހުމަތު ކުރެވިފައެވެ. ނަމަވެސް، ފައިޞަލް ވަނީ އެކަން ދޮގުކުރައްވައި އެ ވުޒާރާގެ މަސައްކަތްތައް ރައީސް ހަވާލުކުރެއްވީ އެކަން އޭނާއަށް ކުރެވޭނެކަން ޔަޤީންވާތީ ކަމަށް ވިދާޅުވެފައެވެ.
ފައިޞަލް މި މަޤާމުން ވަކިކުރެއްވި ސަބަބެއް ރައީސް އޮފީހުން ހާމަކޮށްފައެއް ނުވެއެވެ.
