ރައީސް ޑރ. މުޙައްމަދު މުޢިއްޒުގެ ސިޔާސަތަކީ ޚިޔާލުފާޅުކުރުމުގެ މިނިވަންކަން ރައްކާތެރިކޮށް ކަށަވަރުކުރުން ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު، ހީނާ ވަލީދު ވިދާޅުވެއްޖެއެވެ.
ހީނާ މިހެން ވިދާޅުވީ ރޭ އެކްސްގައި ކުރެއްވި ޕޯސްޓެއްގައެވެ.
The opposition rally tonight, with the presence of law enforcement, is a testament to how this Administration values rights enshrined in the Constitution, such as freedom of assembly and speech. President Dr @MMuizzu’s policy is to protect & ensure freedom of expression.
— Heena Waleed (@MvSpokesperson) January 31, 2025
މިގޮތުން ހީނާ ވިދާޅުވީ ޤާނޫނު ތަންފީޒުކުރާ ފަރާތްތަކުގައި ހާޒިރުގައި ރޭ އިދިކޮޅުން ބޭއްވި މުޒާހަރާއަކީ އެއްވެ އުޅުމާއި ވާހަކަ ދެއްކުމުގެ މިނިވަންކަން ފަދަ ޤާނޫނުއަސާސީގައި ބަޔާންކޮށްފައިވާ ޙައްޤުތައް މި ވެރިކަމުގައި ދޭ އަހައްމިއްޔަތުކަމުގެ ހެއްކެއް ކަމަށެވެ.
އަދި ރައިސް ޑރ. މުޢިއްޒުގެ ސިޔާސަތަކީ ރައީސްގެ ސިޔާސަތަކީ ޚިޔާލުފާޅުކުރުމުގެ މިނިވަންކަން ރައްކާތެރިކޮށް ކަށަވަރުކުރުން ކަމަށްވެސް ހީނާ ވިދާޅުވިއެވެ.
"ފުދިއްޖެ ފުނޑިއްޖެ" ގެ ނަމުގައި އެމްޑީޕީން ރޭ 8:00 ގައި އާޓިފިޝަލް ބީޗު ސަރަހައްދުން ފެށި ހިނގާލުން ކުރިއަށް ދިޔައީ ބޮޑުތަކުރުފާނު މަގާއި އަމީނީ މަގުގައެވެ. މި ހިނގާލުމުގެ ބައިވެރިން ވަނީ ސަރުކާރާ ދެކޮޅަށް އެކި ޝިޢާރުތައް ފާޅުކޮށް އަޑުއުފުލައިފައެވެ. އަދި މުޒާހަރާގެ ބައިވެރިން ވަނީ ރައީސް ޑރ. މުޢިއްޒާއި ސަރުކާރުގެ ބައެއް ވަޒީރުންގެ އިސްތިޢުފާއަށްވެސް ގޮވާލައިފައެވެ.
އެމްޑީޕީން އިންތިޒާމުކޮށްގެން ބޭއްވި މި ހިނގާލުމުގައި އެ ޕާޓީގެ ރައީސް، ޢަބްދުﷲ ޝާހިދާއި، ޗެއަރޕަރސަން އަލްއުސްތާޛް ފައްޔާޟް އިސްމާޢީލާއި، މާލޭ ސިޓީގެ މޭޔަރ، އާދަމް ޢާޒިމާއި، ކުރީގެ ނައިބު ރައީސް ފައިޞަލް ނަސީމާއި، ކުރީ ސަރުކާރުގެ ބައެއް ވަޒީރުންނާއި މަޖިލިސް މެންބަރުންގެ އިތުރުން މަޖިލީހުގެ މިހާރުގެ ބައެއް އެމްޑީޕީ މެންބަރުންވެސް ބައިވެރިވެވަޑައިގެންނެވިއެވެ.
ރޭގެ މި ހިނގާލުން ހުއްޓުވުމަށް ފުލުހުންނާއި ސިފައިން އެއްވެސް މަސައްކަތެއް ކޮށްފައިނުވާއިރު، މިއީ މީގެ ކުރިން ފެނިފައިވާ މަންޒަރެއް ނޫން ކަމަށް ބުނެ ގިނަ ފަރާތްތަކުން ވަނީ ސަރުކާރަށް ތަޢުރީފުކޮށްފައެވެ.
މި ލިޔުން ކިޔާލުމުން
