އެމެރިކާގެ ފްލައިޓަކާއި ހެލިކޮޕްޓަރެއް ޖެހުނު ހާދިސާއާ ގުޅިގެން ރައީސް ތަޢުޒިޔާ ފޮނުއްވައިފި

އެމެރިކާގެ ވޮޝިންގްޓަން ޑީ.ސީއާ ކައިރި ރޯނަލްޑް ރީގަން ވޮޝިންގްޓަން ނޭޝަނަލް އެއާޕޯޓުގައި ޖައްސަން އުޅުނު އެމެރިކަން އެއާލައިންސްގެ ފްލައިޓެއް އެ ޤައުމުގެ އަސްކަރީ ހެލިކޮޕްޓަރަކާ ޖެހި ހިނގި ހާދިސާ އާ ގުޅިގެން ރައީސް ޑރ. މުޙައްމަދު މުޢިއްޒު، އެމެރިކާގެ ރައީސް ޑޮނާލްޑް ޓްރަމްޕަށް ތަޢުޒިޔާގެ މެސެޖެއް ފޮނުއްވައިފިއެވެ. މިގޮތުން އެކްސްގައި ކުރެއްވި ޕޯސްޓެއްގައި ރައީސް ވަނީ، މި ހާދިސާގައި ފުރާނަ ގެއްލިދިޔަ މީހުންގެ ޢާއިލާތަކަށާއި، އެމެރިކާ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ހަމްދަރުދީ ފޮނުއްވާފައިވެއެވެ.

Shocked and saddened by the news of tragic air accident in Washington DC. My deepest condolences to the families and loved ones of the victims. Our thoughts are with @POTUS Trump and the people of the United States.

— Dr Mohamed Muizzu (@MMuizzu) January 31, 2025

އަދި މި ހިތާމައިގެ ދަނޑިވަޅުގައި ދިވެހި ރައްޔިތުން އެމެރިކާއާއެކު ދެމިތިބިކަމުގެ ޔަޤީންކަންވެސް ރައީސް ދެއްވާފައިވެއެވެ. މި ހާދިސާ ހިނގިއިރު އެމެރިކަން އެއާލައިންސްގެ ފްލައިޓުގައި 60 ފަސިންޖަރުންނާއި ހަތަރު ފަޅުވެރިން ތިއްބެވެ. އަދި ހެލިކޮޕްޓަރުގައި ތިބީ ތިން ހަނގުރާމަވެރިންނެވެ. މި ހާދިސާގައި ބޯޓުގައި ތިބި ފަސިންޖަރުންނާއި ފަޅުވެރިން ގެއްލިފައިވާއިރު، އެއްވެސް މީހަކު ސަލާމަތްވާނެ ކަމަކަށް ނުބެލެވޭ ކަމަށް ވޮޝިންގްޓަންގެ ފަޔަރ ޗީފް، ޖޯން ޑޮނެލީ ވަނީ ވިދާޅުވެފައެވެ.