ދުނިޔޭގެ ފުޓްބޯޅަ ފެޑެރޭޝަން (ފީފާ) އިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފޮނުވި ފައިސާއަށް ޚިޔާނާތްތެެެރިވިކަމުގެ ތުހުމަތުގައި އެ އިދާރާގެ ކުރީގެ ރައީސް ބައްސާމް ޢަދީލް ޖަލީލުގެ މައްޗަށް އިތުރަށް ކުރި ދެ ދަޢުވާއަށް އޭނާ އިންކާރު ކޮށްފިއެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން ވަނީ ބައްސާމް އެފްއޭއެމްގެ ރައީސްގެ މަގާމުގައި ހުންނެވިއިރު، އެ އެސޯސިއޭޝަނަށް އެކި ފަރާތްތަކުން ދޭ ފައިސާއަށް ޚިޔާންތްތެރިވެ، އެފްއޭއެމްއަށް ބޭރުގެ ފަރާތްތަކުން އެހީގެ ގޮތުގައި ޔޫއެސް ޑޮލަރުން ލިބޭ ފައިސާ އެ އެސޯސިއޭޝަންގެ އިސްވެރިންނާއި އެސޯސިއޭޝަނާއި ގުޅުން އޮންނަ ފަރާތްތަކާއި، ކުންފުނިތަކުގެ އެކައުންޓްތަކަށް ޖަމާކޮށް ނަހަމަގޮތުގައި ބޭނުންކޮށް މަނީލޯންޑްރިންގ ގެ ޢަމަލުތަކެއް ހިންގާފައިވާ މައްސަލާގައި އޭނާގެ މައްޗަށް އިތުރު ދެ ދަޢުވާއެއް ކުރުމަށް ކްރިމިނަލް ކޯޓަށް ހުށަހަޅައިފައެވެ.
މިގޮތުން ބައްސާމްގެ މައްޗަށް އިތުރަށް އުފުލާފައިވަނީ ޚިޔާނާތްތެރިވުމުގެ ކުށުގެ ދަޢުވާ އާއި މަނީ ލޯންޑްރިންގގެ ކުށުގެ ދަޢުވާ އެވެ.
ބައްސާމްގެ މައްޗަށް ފުރަތަމަ އުފުލި ޚިޔާނާޓްތެރިވުމާއި މަނީ ލޯންޑްރިންގެ ދަޢުވާ ޝަރީޢަތުގެ މިއަދުގެ އަޑުއެހުމުގައި ބައްސާމްގެ ވަކީލު ވިދާޅުވީ ދަޢުވާގައި ބަޔާންކޮށްފައިވަނީ ކަން ހިނގާފައިވާ ގޮތަށް ނޫން ކަމަށާއި، ދެ ދަޢުވާއަށްވެސް އިންކާރު ކުރާ ކަމަށެވެ.
ބައްސާމްގެ ދެ ވަކީލުންވެސް މައްސަލައިން ތަނާޒުލްވުމާ ގުޅިގެން މިއަދު އޭނާ ކޯޓަށް ވަޑައިގަތީ އެހެން ވަކީލަކާ އެކުގައެވެ. އެހެންކަމުން އައު ވަކީލު ވަނީ ދަޢުވާތަކަށް ޖަވާބުދާރީވުމަށް އިތުރު ވަގުތު ބޭނުންވާ ކަމަށް ވިދާޅުވެފައެވެ. ނަމަވެސް ޣާޒީ އިސްމާޢީލް ޝަފީޢު ވަނީ އިތުރު ވަގުތު ދެވެން ނެތް ކަމަށާއި، މިއަދު އެ ދަޢުވާތަކަށް ޖަވާބުދާރީވާން ޖެހޭނެ ކަމަށް ވިދާޅުވެފައެވެ. ބައްސާމްގެ މައްޗަށް އުފުލާފައިވާ ދަޢުވާތަކަށް އޭނާ އިންކާރުކުރުމާ ގުޅިގެން ޣާޒީ ވަނީ ޝަރީޢަތް ފެށުމުގެ ކުރިން ހުށަހެޅުންތަކަށް 10 ދުވަހުގެ މުއްދަތެއް ދެއްވައިފައެވެ.
ބައްސާމްގެ މައްޗަށް ކުރެވޭ ދައުވާތައް:
ގާނޫނުލްއުގޫބާތުގެ ގެ 215 ވަނަ މާއްދާގެ ދަށުން، ޚިޔާނާތްތެރިވުމުގެ ކުށުގެ ދައުވާ.
ދައުވާކުރާ ސަބަބުގެ ޚުލާސާ: ބައްސާމު، އަމީން ކޮންސްޓްރަކްޝަން ޕްރައިވެޓް ލިމިޓެޑްގެ އަމީން އެވެނިއު އިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި، އެފްއޭއެމްގެ 1,200,000 އެމެރިކާ ޑޮލަރަށް ޚިޔާނާތްތެރިވެފައިވާތީ.
އަދަބު: 1 އަހަރާއި 7 މަހާއި 6 ދުވަހުގެ މުއްދަތަކަށް ޖަލަށްލުން.
މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން، މަނީ ލޯންޑްރިންގގެ ކުށުގެ ދައުވާ.
ދައުވާކުރާ ސަބަބުގެ ޚުލާސާ: ބައްސާމު، އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ 8 ކޮޓަރިއާއި 10 ފާހަނައިގެ ނަންބަރު A1205 އާއި A1206 އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން، އަމީން ކޮންސްޓްރަކްޝަނަށް ޖީއެސްޓީ ހިމެނޭ ގޮތަށް ދައްކަންޖެހޭ ޖުމްލަ 25,000,000 ރުފިޔާގެ ތެރެއިން ބުކިންގ ފީ އާއި، ކޮމިޓްމަންޓް ފީ ހިމެނޭ ގޮތަށް އެތަނުގެ އަގަށްވާ ފައިސާގެ ގޮތުގައި އެފްއޭއެމްގެ ޑޮލަރު އެކައުންޓުން އެކި އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާތީ.
އަދަބު: 100,000 ރުފިޔާއާއި 1,000,000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމާއެކު 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށްލުން.
ޕީޖީން ބުނީ މި ޚިޔާނާތުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ 1,200,000 އެމެރިކާ ޑޮލަރު ބައްސާމުގެ އަތުން ނަގައިދިނުމަށް އެދި ހުށަހަޅާފައިވާ ކަމަށެވެ. އަދި ލޯންޑާ ކޮށްފައިވާ މި ފައިސާ ބޭނުންކޮށްގެން ހޯދައި ލިބިގަނެ ބޭނުންކުރަމުން ގެންދިޔަ އަމީން ކޮންސްޓްރަކްޝަންގެ އަމީން އެވެނިއު އެޕަރޓްމަންޓް A1205 އަދި A1206 ދައުލަތަށް ނަގައިދިނުމަށް ވެސް ކޯޓަށް ހުށަހަޅާފައިވާނެ ކަމަށެވެ.
މި ލިޔުން ކިޔާލުމުން
