ފެނަކައިން އައްޑޫގައި ހިންގާ އިންޖީނުގެއަށް ބޭނުންވާ ސްޕެއަރތައް ލިބުން ލަސްވާ ސަބަބު ސާފުކުރުމަށް، ފެނަކަ ކޯޕަރޭޝަނުގެ އިސްވެރިން ރައްޔިތުންގެ މަޖިލީހުގެ މިނިވަން މުއައްސަސާޓަކުގެ ކޮމިޓީއަށް ހާޒިރުކޮށްދިނުމަށް، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤް އެދިވަޑައިގެންފިއެވެ.
މިގޮތުން މަޖިލީހުގެ ރައީސް، ޢަބްދުއްރަޙީމް ޢަބްދުﷲ އަށް އެޑްރެސްކޮށް ފޮނުއްވި ސިޓީގައި ބުނެފައިވަނީ އައްޑޫގެ ކަރަންޓު މައްސަލައާ ގުޅޭގޮތުން އެ ސިޓީގެ ރައްޔިތުންނާއި އައްޑޫގައި ޤާއިމުކޮށްފައިވާ ފެނަކައިގެ އޮފީހުގައި މަސައްކަތްކުރައްވާ ފަރާތްތަކާވެސް ބައްދަލުކުރައްވައި، އެ ފަރާތްތަކުގެ ޚިޔާލާއި މަޝްވަރާ އަދި ކަންބޮޑުވުންތައް އެޅުންފިލުއްވުމަށް މަސައްކަތް ކުރައްވާފައިވާ ކަމަށެވެ. އަޒާން ވިދާޅުވީ އައްޑޫގެ ކަރަންޓުގެ މައްސަލައަށް ހައްލު ނުލިބި ދިގުލައިގެން ދިއުމުގައި ފެނަކައިގެ އެިސްވެރިންގެ އިހުމާލާއި ފަރުވާ ކުޑަކަން އޮތްކަމުގައި ދެކެވަޑައިގަންނަވާ ކަމަށާއި، ފެނަކަ އައްޑޫ އޮފީހުގައި މަސައްކަތް ކުރައްވާ އިސް މުވައްޒަފުން މަޢުލޫމާތު ދެއްވި ގޮތުގައި އައްޑޫގައި ހިންގާ އިންޖީނުގެއަށް ބޭނުންވާ ބައެއް ސްޕެއަރތަކަށް ހެޑް އޮފީހުގައި އެދުނުތާ އަހަރަކަށް ވުރެ ގިނަ ދުވަސް ވެގެންދިޔައިރު ވެސް ނުލިބޭ ސްޕެއަރތައް އެބަހުރި ކަމަށެވެ.
މީގެ އިތުރުން އައްޑޫގައި ފެނަކައިން ހިންގާ އިންޖީނުގޭގައި މިވަގުތު ހުރި 17 އިންޖީނުގެ ތެރެއިން މަސައްކަތް ކުރަނީ 13 އިންޖީނެއް ކަމަށާއި، ހަތަރު އިންޖީނަކަށް މައްސަލަ ދިމާވެފައިވާއިރު، އޭގެ ތެރެއިން އެންމެ އިންޖީނެއް ފިޔަވައި ދެން ހުރި ތިން އިންޖީނު ހުރީ މަރާމާތު ނުކުރެވޭ ހާލުގައި ކަމަށް އެ މުވައްޒަފުން މަޢުލޫމާތު ދެއްވާފައިވާ ކަމަށް އަޒާން ވިދާޅުވިއެވެ. އަދި އިންޖީނުތަކަށް މައްސަލަ ދިމާވާ މައިގަނޑު ސަބަބެއްގެ ގޮތުގައި މުވައްޒަފުން ފާހަގަކުރައްވަނީ ސްޕެއަރ ހޯދުމަށް އެދެނުތާ ގިނަ ދުވަސްތަކެއް ފާއިތުވެގެން ދާއިރުވެސް ސްޕެއަރތައް ނުލިބި އިންޖީނުތަކުގެ މެއިންޓަނަންސް އަދި މަރާމާތުގެ މަސައްކަތް ނުކުރެވުން ކަމަށެވެ.
މީގެ އިތުރުން އަޒާން ވިދާޅުވީ ކަރަންޓު މައްސަލަ ހައްލުނުވެ ދިގުލައިގެންދާތީ، އެކަމަށް ހައްލެއް ހޯދުމަށް ފެނަކައަށް ބާރުއެޅުމަށްޓަކައި މި މަހުގެ 14 ވަނަ ދުވަހު އައްޑޫއަށް ނިސްބަތްވާ އެހެން ބައެއް މަޖިލިސް މެންބަރުންނާއެކު ފެނަކައިގެ އިސްވެރިންނާ ބައްދަލުކުރެއްވި ކަމަށާއި، އެ ބައްދަލުވުމުގައި އިންޖީނުގެއަށް ބޭނުންވާ ސްޕެއަރތައް ނުލިބި ލަސްވާކަމުގެ ޝަކުވާ ކުރުމުން، "އައްޑޫއަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ބޭނުންވާ ސްޕެއަރތައް ހަތް ދުވަހުގެ ތެރޭގައި ފޮނުވާނެ ކަމަށް ފެނަކައިގެ މެނޭޖިންގ ޑިރެކްޓަރ ހިމެނިވަޑައިގަންނަވާހެން ބައްދަލުވުމުގައި ބައިވެރިވެވަޑައިގެންނެވި އެ ކުންފުނީގެ އިސްވެރިންގެ ފަރާތުން ޔަޤީންކަން ދެއްވާފައިވާ ކަމަށެވެ. ނަމަވެސް އޭގެ 12 ވަރަކަށް ދުވަސް ފަހުން އިއްޔެގެ ވަގުތެއްގައި އައްޑޫގައި މަސައްކަތްކުރާ ފެނަކައިގެ މުވައްޒަފުންނާ ބައްދަލުކުރައްވައި މަޢުލޫމާތު އޮޅުންފިލުވުމުން ކަށަވަރުކުރެއްވީ ފެނަކައިގެ ހެޑް އޮފީހުން ވިދާޅުވި ގޮތަށް އެއްވެސް ސްޕެއަރއެއް އައްޑޫއަށް ފޮނުވާފައި ނުވާ ކަމަށެވެ.
ކުރިއަށް އޮތް ރަމަޟާން މަހު އައްޑޫގައި ކަރަންޓު ބޭނުންކުރާ މިންވަރު އިތުރުވާނެ ކަމަށް ލަފާކުރެވޢިރު، އިންޖީނުގޭގެ މިހާރުގެ ކެޕޭސިޓީއަށް އިތުރު ހަތަރު މެގަވޯޓު އިތުރުނުކުރެވޭ ނަމަ ރަމަޟާން މަހުވެސް އައްޑޫން ކަރަންޓު ކެނޑޭ މައްސަލަ ހައްލުނުކުރެވޭނެ ކަމަށް މުވައްޒަފުން މަޢުލޫމާތު ދެއްވި ކަމަށް އަޒާން ވިދާޅުވިއެވެ. އަދި އިންޖީނުގެއަށް ބޭނުންވާ ތަކެތި ނުލިބުމަކީވެސް ބޮޑު ގޮންޖެހުމެއް ކަމުގައި އެ މުވައްޒަފުން ފާހަގަކުރައްވާފައިވެއެވެ.
"އެނގިވަޑައިގަންނަވާނެ ފަދައިން ކަރަންޓުގެ މައްސަލައަކީ އައްޑޫ ސިޓީގެ ރައްޔިތުންނަށް ދިމާވެފައިވާ ބޮޑު ތަކުލީފަކަށް ވެފައިވާއިރު، ފެނަކަ ކޯޕަރޭޝަނުގެ އިސްވެރިންގެ ފަރާތުން ފެންނަމުންދާ ފަރުވާ ކުޑަކަމާއި އިހުމާލުވުންތަކަށް ބަލާއިރު، ކަރަންޓުގެ މައްސަލަ ހައްލެއް ހޯދުމާ ދިމާލަށް ފެނަކައިން މަސައްކަތް ކުރާތަން ނުފެނެއެވެ. އައްޑޫގެ އިންޖީނުގޭގެ ޙާލަތު ހުރިގޮތުން އައްޑޫ އިން ކަރަންޓު ނުކެނޑޭ ދުވަހެއް މަދެވެ. މިއީ އަޅުގަނޑު ނިސްބަތްވާ ހިތަދޫ މެދު ދާއިރާގެ ރައްޔިތުން، ޖުމުލަ ގޮތެއްގައި އައްޑޫގެ ރައްޔިތުންނާއި އަދި އަޅުގަނޑުގެވެސް ކަންބޮޑުވުމެކެވެ."
އެހެންކަމުން ފެނަކައިގެ އެމްޑީ މުޙައްމަދު ނަޖާހާއި، ކުރީގެ ޕްރޮކިއުމަންޓް ހެޑް، ޢަބްދުލް ވާޙިދާއި، ޕްރޮކިއުމަންޓް ހެޑް މަރިޔަމް ޝަހުލާ އާއި، ސީއެފްއޯ ޢަބްދުﷲ ވަޙީދާއި ކުރީގެ ސީއެފްއޯ މުޙައްމަދު މަސްޢޫދާއި ސީޓީއޯ ޢަބްދުﷲ ނާޝިދު، މަޖިލީހުގެ މިނިވަން މުއައްސަސާތަކުގެ ކޮމިޓީއަށް ހާޒިރުކޮށްދެއްވުމަށާއި، އެ ބޭފުޅުން ހާޒިރުކުރައްވާއިރު، އައްޑޫގެ ކަރަންޓު މައްސަލަ ހައްލުކުރުމަށް ފެނަކައިން އެކުލަވާލާފައިވާ ޓައިމްލައިނެއް ނުވަތަ ޕްލޭނެއް އޮތްނަމަ އެ މަޢުލޫމާތުވެސް ސާފުކޮށްދެއްވުމަށް އަޒާން ވަނީ އެދިވަޑައިގެންފައެވެ.
މި ލިޔުން ކިޔާލުމުން
