އެސްޓޯނިއާއަށް ޒިޔާރާތްކުރެއްވުމަށް ރައީސުމްހުމްހޫރިއްޔާ ޑރ. މުޙައްމަދު މުޢިއްޒަށްދެއްވި ދަޢުވަތަށްޓަކައި، އެމަނިކުފާނު އެ ޤައުމުގެ ރައީސް ޑޮކްޓަރ އަލާރް ކަރިސް އާއި އެ ޤައުމުގެ ސަރުކާރަށް ޝުކުރު ދަންނަވައިފިއެވެ.
މިގޮތުން އެމަނިކުފާނުގެ ރަސްމީ އެކްސް އެކައުންޓުން މިއަދު ކުރެއްވި ޕޯސްޓެއްގައި ރައީސުލްޖުމްހޫރިއްޔާ ވިދާޅުވީ، އެމަނިކުފާނު އެ ޤައުމަށް ވަޑައިގެންނެފި ފަހުން ވަރަށް ހޫނު މަރުހަބާއާއި މެހެމާންދާރީއެއް ލިބިވަޑައިގެންފައިވާ ކަމަށާއި، އެ ޤައުމުގައި ހުންނެވުމަކީ އެމަނިކުފާނަށް ލިބިވަޑައިގަންނަވާ ޝަރަފެއް ކަމަށެވެ.
Thank you, President @AlarKaris and the Government of Estonia, for the kind invitation to me to undertake this historic visit to your beautiful country. The warm hospitality and heartfelt welcome I received since my arrival have been excellent. It is indeed an honor to be here.… pic.twitter.com/ERqJvI1t9t
— Dr Mohamed Muizzu (@MMuizzu) January 14, 2025
މީގެ އިތުރުން، ރައީސް ޑޮކްޓަރ އަލާރް ކަރިސްއާއެކު އިއްޔެ ބޭއްވުނީ ވަރަށް ރަނގަޅު ބައްދަލުވުމެއް ކަމަށާއި، ދެ ޤައުމުގެ ގުޅުން ބަދަހިކުރުމަށް އަމާޒުކޮށްގެން އުފެއްދުންތެރި މަޝްވަރާތަކެއް ކުރެވިފައިވާ ކަމަށް އެމަނިކުފާނު ވިދާޅުވިއެވެ.
އަދި ޑިޖިޓަލް ގަވަރނަންސް އާއި ސައިބަރ ރެސިލިއަންސް އާއި މޫސުމީ ބަދަލުތަކާއި ތަޢުލީމުގެ އިތުރުން އެހެނިހެން ދާއިރާތަކާ ބެހޭގޮތުން ދެ ބޭފުޅުން ހިއްސާކުރައްވާ ތަޞައްވުރަކީ، ކުރިއަށް އޮތް އަހަރުތަކުގައި ދެ ޤައުމުގެ ކުރިއެރުމަށްވެސް މަގުފަހިކޮށްދޭނެ ކަމެއް ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސް ޑޮކްޓަރ އަލާރް ކަރިސް ވިދާޅުވި ފަދައިން، ރާއްޖެއާއި އެސްޓޯނިއާ ފަދަ ކުދި ދައުލަތްތަކުގެ މެދުގައި އެއްބައިވަންތަކަން އޮތުމަކީ އަޅުގަނޑުމެންގެ ޤައުމުތަކުގެ ސަލާމަތާއި އިސްތިގުލާލުގެ އިތުރުން، ދުނިޔޭގެ ޞުލްޙައާއި ދެމެހެއްޓެނިވި ތަރައްޤީއަށްވެސް ވަރަށް މުހިންމު ކަމެއް ކަމުގައި އެމަނިކުފާނުގެ ޕޯސްޓުގައި ވިދާޅުވެފައިވެއެވެ.
ރައީސުލްޖުމްހޫރިއްޔާ އެސްޓޯނިއާއަށް ކުރައްވަމުން ގެންދަވާ ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއްވެސް މި ދަތުރުފުޅުގައި ބައިވެރިވެވަޑައިގަންނަވައެވެ.
ރައީސުލްޖުމްހޫރިއްޔާ އެސްޓޯނިއާއަށް އިއްޔެ ވަޑައިގަތުމުން، އެމަނިކުފާނަށާއި އެމަނިކުފާނުގެ ވަފުދަށް އެސްޓޯނިއާގެ ރައީސް ވަނީ މަރުޙަބާ ދަންނަވައިފައެވެ. މި ރަސްމިއްޔާތު އޮތީ އިއްޔެ މެންދުރުފަހު އެ ޤައުމުގެ ރިޔާސީ ގަނޑުވަރުގައެވެ.
މި ރަސްމިއްޔާތުގައި އެސްޓޯނިއާގެ އަސްކަރިއްޔާއިން ދެ ޤައުމުގެ ޤައުމީ ސަލާމް ކުޅެފައިވެއެވެ. އަދި އެޔަށްފަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެސްޓޯނިއާގެ ރައީސް ޑޮކްޓަރ ކަރިސް ވަނީ އެ ދެބޭފުޅުންގެ ޝަރަފުގައި އޮތް ޝަރަފްގެ ގާޑް، އިންސްޕެކްޓް ކޮށްދެއްވާފައެވެ.
މި ރަސްމިއްޔާތުގައި، ރައީސުލްޖުމްހޫރިއްޔާ ޑޮކްޓަރ މުޢިއްޒަށް އެސްޓޯނިއާގެ އިއްޒަތްތެރިން މަރުޙަބާ ވިދާޅުވެ ތަޢާރަފުވެވަޑައިގަތުމަށްފަހު، ދިވެހި ވަފުދުގެ ބޭފުޅުން ރައީސް ޑޮކްޓަރ ކަރިސްއަށް ތަޢާރަފުކޮށްދެއްވިއެވެ. އަދި ދެ ރައީސުން އެކުގައި ހަނދާނީ ފޮޓޯފުޅެއް ނެންގެވުމަށްފަހު، ގަނޑުވަރުގެ މެހުމާނުން ސޮއިކުރައްވާ ފޮތުގައި ރައީސުލްޖުމްހޫރިއްޔާ ސޮއިކުރެއްވިއެވެ.
މި ލިޔުން ކިޔާލުމުން
