މި ފަހުގެ ތާރީޚެއްގައިވެސް ޓެކްނޮލޮޖީއަށް އެންމެ ބޮޑު އިސްކަމެއް ދެއްވާ ވެރިއަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ، ޑރ. މުހައްމަދު ކިނާނަތު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެސްޓޯނިއާގެ ރައީސް ޑރ. އަލާރް ކަރިސްގެ ދަޢުވަތަކަށް އެ ޤައުމަށް ކުރައްވާ ރަސްމީ ދަތުރުފުޅާ ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން ސްޓޭޓް މިނިސްޓަރ ޑރ. ކިނާނަތު ވިދާޅުވީ ރާއްޖެ އާއި ރާއްޖެއިން ބޭރުގައި ބާއްވާ އެކިއެކި ރަސްމިއްޔާތުތަކުގައި ޓެކްނޮލޮޖީގެ ވާހަކަ ރައީސް ފާހަގަކުރައްވާ ކަމަށާއި މެނިފެސްޓޯގައި އެމަނިކުފާނު ފާހަގަކުރައްވާފައިވާ ވަރަށް ގިނަ ކަންތައްތަކެއް ޓެކްނޮލޮޖީ ދާއިރާގައި އެބަހުރި ކަމަށެވެ.
"ވަރަށް ގިނަ ޓެކްނޮލޮޖީ ބައިބައި އެބަހިމެނޭ. ދެން މިހާރު އަޅުގަނޑުމެން މި މަސައްކަތް ކުރަނީ މެނިފެސްޓޯގައި ރައީސް ފާހަގަކުރައްވާފައިވާ ހުރިހާ ކަމެއް ފުރިހަމަކުރަން. ކޮންމެހެން އަޅުގަނޑުމެންނެއް މަޑެއްނުކުރާނަން މެނިފެސްޓޯގެ ކަންތައްތައް ފުރިހަމަކުރާކަށް ފަސް އަހަރުވަންދެނެއް. އަޅުގަނޑުމެން އޭގައި ހުރި ހުރިހާ ކަމެއް ފުރިހަމަ ކުރުމުގެ މަސައްކަތްތައް ކުރިއަށްގެންދާނަން"، ޑރ. ކިނާނަތު ވިދާޅުވިއެވެ.
އެގޮތުން އެންސީއައިޓީގެ ފަރާތުން ސްޓްރެޓީޖިކް އެކްޝަން ޕްލޭނެއް ހަދާފައިވާކަން ފާހަގަކުރައްވާ ސްޓޭޓް މިނިސްޓަރ ވިދާޅުވީ އެ އެކްޝަން ޕްލޭން އެލައިންވެގެން ދާނީ ރައީސްގެ މެނިފެސްޓޯގައި ހިމަނާފައިވާ ކަންތައްތަކާއި އަދި އެކިއެކި ފޯރަމްތަކުގައި ޓެކްނޮލޮޖީއާ ގުޅޭގޮތުން ރައީސް ދައްކަވާފައިވާ ވާހަކަފުޅުތައްވެސް ހިމެނޭނެ ގޮތަަށް ކަމަށެވެ.
އަދި މި އެކްޝަން ޕްލޭން ކުރިއަށްގެންދާނީ އެކި އަހަރުތަކަށް ބަހާލައިގެން ކަމަށްވެސް ސްޓޭޓް މިނިސްޓަރ ޑރ. ކިނާނަތު ވިދާޅުވިއެވެ.
ޓެކްނޮލޮޖީގެ ދާއިރާއަށް ރައީސް ދެއްވާ އަހަމިއްޔަތު ޓެކް އިންޑަސްޓްރީގެ ބޭފުޅުން ފާހަގަކުރައްވާކަން ހާމަކުރައްވާ ސްޓޭޓް މިނިސްޓަރ ވިދާޅުވީ އެސްޓޯނިއާ ދަތުރުވެގެންދާނީ ވަރަށް ތާރީޚީ ދަތުރަކަށް ކަމަށެވެ.
"އެގޮތުން ޓެކްނޮލޮޖީ އެހެން ހަރުފަތަކަށް ގެންދިޔުމަށްޓަކައި ވަރަށް މުހިންމު އެހީތެރިކަމަކަށް ވާނެ ރައީސްގެ މި ދަތުރުފުޅުގެ ސަބަބުން. އަޅުގަނޑުމެންނަށް ވަރަށް ގިނަ ކަންކަން ދަސްވެ އޭގެ އިތުރުން ދެ ގައުމުގެ ދެމެދުގަ ވެވޭ އެއްބެސްވުންތައް އިމްޕްލިމެންޓް ވެއްޖެކަމަށްވާނަމަ ޓެކްނޮލޮޖީ ދާއިރާއަށް ވަރަށް ބޮޑު އިންގިލާބެއް އަންނާނެ"، ޑރ. ކިނާނަތު ވިދާޅުވިއެވެ.
ރައީސްގެ އެސްޓޯނިއާގެ ދަތުރުފުޅުގައި އެއް ޤައުމުން އަނެއް ޤައުމަށް އިތުރަށް އެއްބާރުލުން ދިނުމާއި، ޑިޖިޓަލް، ސައިބަރ އަދި އީ-ގަވަނަންސް، މޫސުމީ ބަދަލު، ތިމާވެށީގެ މައްސަލަތައް އަދި ސައިންސާއި ތަޢުލީމީ ދާއިރާގައި އެކުގައި ކުރެވިދާނެ މަސައްކަތްތަކުގެ މައްޗަށް މަޝްވަރާކުރުމަށް ވަނީ ހަމަޖެހިފައެވެ.
ދަތުރުފުޅުގައި މަޝްވަރާތައް ކުރައްވާނީ، އީޖާދީ އުފެއްދުންތެރިކަމާއި އަދި ފަންނިއްޔާތުގެ ދާއިރާގައި އެސްޓޯނިއާއިން ހޯދާފައިވާ ކުރިއެރުންތަކުގެ މައްޗަށެވެ. އެސްޓޯނިއާގެ ރައީސަށް ލަފާއަރުވާ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ރައުންޑް ޓޭބަލް ބައްދަލުވުމެއްގައިވެސް ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ. މި ހަރަކާތްތަކުގެ ތެރެއިން، އެއް ޤައުމުން އަނެއް ޤައުމަށް އެއްބާރުލުންދެވިދާނޭ ގޮތްތައް ނިންމުމަށް މަގުފަހިވެގެންދާނެއެވެ.
އެސްޓޯނިއާއިން ޑިޖިޓަލް ޓްރާންސްފޯމޭޝަނަށް ކުރި ދަތުރަކީ، މުޅި ދުނިޔޭގެ ތައުރީފް ލިބިފައިވާ މަސައްކަތެކެވެ. އަދި އެ ޤައުމަކީ، ޢާންމު ޚިދުމަތްތައް ޑިޖިޓަލައިޒްކުރުމުގައި ދުނިޔޭގައި އެންމެ މަތީ ފަންތީގައި ގުނާލެވޭ ޤައުމެކެވެ. ޑިޖިޓަލް ގަވަނަންސް އާއި، އީ-ސަރވިސް ގެ ދާއިރާގައި ދުނިޔޭގެ ލީޑަރެއްކަމުގައި ބެލެވިފައިވާ އެސްޓޯނިއާ މަޝްހޫރުވެފައިވަނީ އެ ޤައުމުން ތަޢާރަފުކުރި އީ-ރެޒިޑެންސީ ޕްރޮގްރާމާއި، އީ-ގަވަނަންސް މަންސަތަކާއި، ޢާންމު ޚިދުމަތްތައް ފޯރުކޮށްދިނުމުގައި ބުގިސްކަމާއެކު ޑިޖިޓަލް ޙައްލުތައް ހޯދައިދީފައިވާ ގޮތުގެ ސަބަބުންނެވެ.
ޑިޖިޓަލް ޓްރާންސްފޯމޭޝަނަކީ، ރައީސް އިސްކަންދެއްވާ ކަމެކެވެ. ޑިޖިޓަލް އިޤްތިޞާދެއް ޤާއިމުކުރައްވައި، 2030 ވަނަ އަހަރު އަންނަންވާއިރަށް، ރާއްޖޭގެ އުފެއްދުންތެރިކަމުގެ ނިސްބަތުގެ 30 އިންސައްތަ ހިއްސާކުރަނީ، ޑިޖިޓަލް އިޤްތިޞާދަކުން ކަމަށް ހެދުމަކީ އެމަނިކުފާނުގެ ވަޢުދުފުޅެކެވެ. މިއީ 2040 ވަނަ އަހަރު އަންނަ އިރު ދިވެހިރާއްޖެއަކީ ތަރައްޤީވެފައިވާ ޤައުމަކަށް ހެއްދެވުމަށް އެމަނިކުފާނު ގެންގުޅުއްވާ ތަޞައްވަރުގެ މުހިންމު ބަހާއެކެވެ. ސަރުކާރުން މި ވަގުތު ދަނީ، ޑިޖިޓަލް ޓްރާންސްފޯމޭޝަން ރޯޑްމެޕް ސްޓްރެޓަޖީ އެކުލަވާލުމުގެ މަސައްކަތްކުރައްވަމުންނެވެ. އަދި ޔުނެސްކޯގެ އޭ.އައި ރެޑިނަސް ޓޫލްސް ބޭނުންކޮށްގެން، އޭ.އައި ރެޑިނަސް އެސެސްމަންޓެއް ހަދައި، ޤައުމީ އޭ.އައި. މާސްޓަރޕްލޭނެއް އެކުލަވާމުގެ މަސައްކަތްވެސް، ސަރުކާރުން ދަނީ ކުރައްވަމުންނެވެ.
މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި، ޚާރިޖީ ވަޒީރު ޑޮކްޓަރ ޢަބްދުﷲ ޚަލީލާއި، ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ ޢިހުސާނުގެ އިތުރުން ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ. އަދި ރާއްޖޭގެ ފަންނިއްޔާތުގެ ދާއިރާގެ މާހިރުންގެ މައްޗަށް އެކުލެވިގެންވާ ވަފުދެއްވެސް މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި އެސްޓޯނިއާއަށް ވަޑައިގެން، އެ ޤައުމުގެ ޑިޖިޓަލް ދާއިރާގެ ކުންފުނިތަކާއި މުވައްސަސާތަކާއެކު މަސައްކަތްތަކެއް ކުރެއްވުމަށް ހަމަޖެހިފައިވެއެވެ.
މި ލިޔުން ކިޔާލުމުން
