ހިޖްރަ ނަމަކަށް ކިޔާ ޖަމާއަތެއްގެ ހަވާލުގައި މައްކާއަށް ގޮސް ހާލުގައި ޖެހުނު ދިވެހި ޢުމްރާވެރިން މި ބުރާސްފަތި ދުވަހު ރާއްޖެ ގެނައުމަށް ހަމަޖެހިއްޖެއެވެ.
އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު މިރޭ ވިދާޅުވީ، ހިޖުރަ ކުންފުނީގެ ޙަވާލުގައި ދިޔަ އުމްރާވެރިން މިހާރުވަނީ، މިނިސްޓްރީގެ އިރުޝާދުގެ ދަށުން ޙައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައި ކަމަށެވެ.
"އިންޝާ ﷲ (11 ޖަނަވަރީ) ހެނދުނު 8.10 ގައި ޤަތަރު އެެއަަވޭސް އިން އެފަރާތްތައް މާލެ ގެނެވޭނެ"، ޑރ. ޝަހީމް ވިދާޅުވިއެވެ.
އަލްހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުގެ ފަރާތުން އުމްރާއަށް ދިޔަ މީހުން ރާއްޖެއަށް ނާދެވި މައްކާގައި ހާލުގައިޖެހުނު މައްސަލާގައި، އެ ކުންފުނި އެއްލައްކަ ރުފިޔާއިން ޖޫރިމަނާކޮށް، އިސްލާމިކް މިނިސްޓްރީން ދޫކޮށްފައިވާ ހުއްދަ ހިފަހައްޓައިފިއެވެ.
އިސްލާމިކް މިނިސްޓްރީން މިއަދު ވަނީ އަލްހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުގެ ހުއްދަ ހިފެހެއްޓުމަށް ނިންމާ ގިނަ ފިޔަވަޅުތަކެއް އަޅާފައެވެ. މީގެ އިތުރުން އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށްވެސް އުމުރާއަށް މީހުން ގެންދިއުމުގެ ހުއްދަނުދިނުމަށް ވެސް ވަނީ ނިންމާފައެވެ.
އެ ގުރޫޕުގެ ފަރާތުން ޢުމުރާއަށް ގެންގޮސް ޙާލުގައި ޖެހުނު މީހުން ރާއްޖެ ގެނައުމަށް އިސްލާމިކް މިނިސްޓްރީން ކުރި ޚަރަދު އެކުންފުނިން ހޯދުމަށްވެސް ވަނީ ނިންމާފައެވެ.
"ޢުމުރާއަށް ގެންދިއުމުގައި ދިވެހިރާއްޖެއިން ޢުމުރާއަށް މީހުން ގެންދިއުމާއި ބެހޭ އުޞޫލު" އާޢި ޚިލާފުވެފައިވާތީ އެ މައްސަލަ ތަހްޤީޤް ކުރުމަށް ފުލުހުންނަށް ވެސް ވަނީ ހުށަހަޅާފައެވެ.
އިސްލާމިކް މިނިސްޓަރ ވިދާޅުވީ އަލްހިޖްރަ ޓްރެވަލް އެންޑް ޓުއާސް ޕްރައިވެޓް ލިމިޓެޑުގެ ގެ ފަރާތުން އުމުރާއަށް ގޮސް ހާލުގައި ޖެހިފައިވަނީ 23 އުމްރާވެރިންނެވެ. އޭގެ ތެރޭގައި 12 އަހަރުން ދަށުގެ ތިން ކުޑަކުދިން ތިއްބިކަމަށްވެސް މިނިސްޓަރ ވަނީ ވިދާޅުވެފައެވެ.
މި ލިޔުން ކިޔާލުމުން
