ބޭންކް އޮފް މޯލްޑިވްސް (ބީއެމްއެލް) އިން ކަސްޓަމަރުންނަށް ޚިދުމަތް ދެމުން އަންނަ އެއްވެސް ވަސީލަތެއް މެދުވެރިކޮށް ކްރިޕްޓޯ އެކްސްޗޭންޖް ކުރުމުގެ ޚިދުމަތެއް ނުދޭ ކަމަށް އެ ބޭންކުން ބުނެފިއެވެ.
އޮންލައިން ޓްރޭޑްކޮށްގެން ހޯދާ ކްރިޕްޓޯ ކަރަންސީ ބީއެމްއެލްގެ އޭޓީއެމްތަކުން އެކްސްޗޭންޖް ކުރެވޭ ކަމަށް ދޭހަވާ ގޮތަށް މީސްމީޑިއާގައި ދައުރުވަމުންދާ ވީޑިއޯއާ ގުޅިގެން ބީއެމްއެލް އިން މިއަދު ނެރުނު ބަޔާނުގައި ބުނެފައިވަނީ އެ ވީޑިއޯ ގުޅިގެން ބައެއް ކަސްޓަމަރުން ބޭންކަށް ސުވާލު ހުށަހަޅަމުންދާ ކަމަށާއި، ކްރިޕްޓޯ ކަރަންސީ އެކްސްޗޭންޖް ކުރުމުގެ ޚިދުމަތް ބޭންކުން ނުދޭ ކަމަށެވެ.
ބީއެމްއެލް އިން ބުނީ އެ ބޭންކްގެ އޭޓީއެމްތަކުން އެމެރިކަން އެކްސްޕްރެސް، ވިސާ އާއި މާސްޓަރކާޑުގެ އިތުރުން އެހެނިހެން ބައިނަލްއަޤްވާމީ ބްރޭންޑްތަކުގެ ކާޑުން މުޢާމަލާތް ހިންގޭނެ ކަމަށެވެ. އަދި މިފަދަ ބައިނަލްއަޤްވާމީ ކާޑުތަކުން، ކަނޑައެޅިފައިވާ ލިމިޓުތަކެއްގައި އޭޓީއެމް މެދުވެރިކޮށް މުޢާމަލާތް ކުރެވުނު ނަމަވެސް، ދައުރުވަމުންދާ ވީޑިއޯގައި ބަޔާންކޮށްފައިވާ ގޮތަށް އެއްވެސް ކާޑެއް ބޭނުންކޮށްގެން އެކައުންޓުން 100،000 ޑޮލަރުގެ އަދަދަށްވާ ދިވެހި ފައިސާ އެއްފަހަރާ ނުނެގޭނެ ކަމަށް ބީއެމްއެލް އިން ބުނެފައިވެއެވެ.
މީގެ އިތުރުން، ބޭންކުގެ އޭޓީއެމް އަދި ލޯގޯ ބޭނުންކޮށްގެން ކަސްޓަމަރުންނަށާއި އާންމުންނަށް އޮޅޭ ގޮތަށް ކްރިޕްޓޯ އެކްސްޗޭންޖް ކުރުމުގައި ބޭންކުން ޝާމިލުވެ އެކަމަށް މަގުފަހިކޮށްދޭ ކަމަށް ދޭހަވާ ގޮތަށް މިފަދަ ވީޑިއޯއެއް އާންމުކޮށްފައިވާތީ ހިތާމަކޮށް، އެކަން ކުށްވެރިކުރާ ކަމަށް ބީއެމްއެލްގެ ބަޔާނުގައި ބުނެފައިވެއެވެ.
މި ލިޔުން ކިޔާލުމުން
