ސީރިޔާގައި އައު ރިޔާސީ އިންތިޚާބެއް ބޭއްވުމަށް 4 އަހަރު ނަގާފާނެ ކަމަށް ސިރިޔާގެ ވަގުތީ ލީޑަރު އަޙްމަދު އައް ޝަރާއު ޓީވީއަށް ދެއްވި އިންޓަވިއުއެއްގައި ވިދާޅުވެއްޖެއެވެ.
މިއީ އޭނާގެ ޖަމާޢަތް ކަމުގައިވާ ހަޔާތު ތަޙްރީރު އައްޝާމް (އެޗްޓީއެސް) އިން ކުރީގެ ރައީސް ބައްޝާރު އަލް އަސަދު ވައްޓާލުމަށް ކުރިއަށް ގެންދިޔަ ހަނގުރާމައަށް ފަހު, ސީރިޔާގައި އިންތިޚާބެއް ބޭއްވިދާނެ މުއްދަތެއް ބަޔާންކުރެއްވި ފުރަތަމަ ފަހަރެވެ.
އާދީއްތަ ދުވަހު ސައުދީ ސަރުކާރުގެ ޓީވީ ޗެނަލް, އަލް އަރަބިއްޔާއަށް ދެއްވި އިންޓަވިއުގައި އޭނާ ވިދާޅުވީ އައު ޤާނޫނު. އަސާސީއެއް އެކުލަވާލުމަށް 3 އަހަރު ވަރު ނަގާފާނެ ކަމަށެވެ.
އަސަދުގެ ވެރިކަން ވައްޓާލުމަށްފަހު، ސީރިޔާގެ ރައްޔިތުންނަށް އެކަށީގެންވާ ފަދަ ބަދަލުތަކެއް އަދި ޢާންމު ޚިދުމަތްތަކުގައި ކުރިއެރުންތަކެއް ފެންނަން ފަށާނީ އެއް އަހަރު ފަހުން ކަމަށްވެސް އޭނާ ވިދާޅުވިއެވެ.
ސީރިޔާގެ ޤާނޫނީ ނިޒާމްތައް އަލުން ބިނާކުރަން ޖެހޭނެ ކަމަށާއި، ސައްޙަ އިންތިޚާބުތަކެއް ބޭއްވުމަށްޓަކައި އާބާދީގެ ތަފްޞީލީ ބޯހިމެނުމެއް ވެސް ހަދަން ޖެހޭނެ ކަމަށް ޝަރާއު ވިދާޅުވިއެވެ.
ކުރިން އަބޫ މުޙައްމަދު އަލް ޖޯލާނީގެ ނަމުން މަޝްހޫރުވެފައިވާ ޝަރާއު ވަނީ މި މަހުގެ ކުރީކޮޅު އަސަދުގެ ރިޔާސަތު ވެއްޓުނު ފަހުން ޤައުމުގެ އައު ވެރިކަން ހިންގުމުގައި ވަގުތީ ގޮތުން ހަވާލުވެ ވަޑައިގެންފައެވެ.
އދ އާއި ގިނަ ޤައުމުތަކުން ޓެރަރިސްޓު ޖަމާޢަތެއްގެ ގޮތުގައި ކަނޑައަޅާފައިވާ އެޗްޓީއެސް އަކީ ކުރީގެ އިސްލާމިކް ސްޓޭޓް އަލް ޤާޢިދާއާ ގުޅުން އޮތް ޖަމާޢަތަކެވެ. މި ޖަމާޢަތް ކުރިއަށް އޮތްތާގައި އުވާލެވޭނެ ކަމަށް, ޤައުމީ ޑައިލޮގް ކޮންފަރެންސެއްގައި ޝަރާއު ވަނީ ވިދާޅުވެފައެވެ. ނަމަވެސް، މި ކަމުގެ އިތުރު ތަފްޞީލެއް ދެއްވާފައެއް ނުވެއެވެ.
މި ބައްދަލުވުމަކީ 13 އަހަރުގެ އަހުލީ ހަނގުރާމައަކަށްފަހު ޤައުމު އެއްބައިވަންތަކުރުމުގެ ވަޢުދުވެފައިވާ މަޤްޞަދު ޙާޞިލުކުރެވޭ މިންވަރު ބެލުމަށް ސީރިޔާގެ އައު ސަރުކާރުން ބާއްވަމުން ގެންދާ ޓެސްޓު މަރުހަލާ އެއްކަމުގައި ވެދާނެކަމަށް ލަފާކުރެވެއެވެ.
ސިރިޔާގައި ދިރިއުޅޭ ގިނަ ނަސްލުތަކުގެ ހައްޤުތައް ރައްކާކުރެވޭނެ ގޮތާއި މެދެ އަމާޒު ކުރެވޭ ފާޑުކިޔުންތަކަށް ޖަވާބުދެއްވަމުން،ޝަރާއު ވިދާޅުވެފައި ވަނީ އެއްވެސް ފަރާތެއް އެކަހެރި ނުކުރާނެ ކަމަށާއި, ޤައުމުގައި ތިބި މައިނޯރިޓީ ގްރޫޕުތަކުގެ ޙައްޤުތަކާއި މިނިވަންކަން ރައްކާތެރިކޮށްދޭނެ ކަމަށް ވަޢުދުވާކަމަށެވެ.
ސީރިޔާގައި ދިރިއުޅެނީ ކުރުދުންނާއި، އަރުމީނިއަނުންނާއި، އެސީރިއަނުންނާއި، ކްރިސްޓިއަނުންނާއި، ދުރޫޒުންނާއި، ޢަލަވީ ޝީޢާއިންނާއި، ޢަރަބި ސުންނީންފަދަ ގިނަ ނަސްލުތަކާއި ދީނީ ގްރޫޕުތަކެވެ. މީގެ ތެރެއިން މުސްލިމު އާބާދީގެ ބޮޑު ބައެއް ހިއްސާކުރަނީ އެންމެ ފަހުން ބުނެވުނު ޢަރަބި ސުންނީންނެވެ.
ވޭތުވެދިޔަ ހަފުތާގައި, އަސަދަށް ތާއީދުކުރާ ފަރާތްތަކަށް އަމާޒުކޮށް ދިން ޙަމަލާއެއްގައި 300 އާ ގާތްކުރާ އަދަދަކަށް މީހުން ހައްޔަރުކުރެވިފައިވާ ކަމަށް, ޔޫކޭގައި މަރުކަޒުކޮށްގެން ހިންގާ ހަނގުރާމައިގެ މޮނިޓަރިންގ ޖަމްޢިއްޔާއަކުން ވަނީ ބުނެފައެވެ.
ސީރިއަން އޮބްޒަވޭޓަރީ ފޮރ ހިއުމަން ރައިޓްސްގެ ވެރިޔާ ރާމީ ޢަބްދުއްރަޙްމާން ވިދާޅުވި ގޮތުގައި ހައްޔަރުކުރެވުނު މީހުންގެ ތެރޭގައި ޖާސޫސުންނާއި، ވެރިކަމަށް ތާއީދުކުރާ ހަނގުރާމަވެރިންނާއި ކުރީގެ ސިފައިން ހިމެނެއެވެ.
އޭނާ އޭއެފްޕީ ނިއުސް އޭޖެންސީއަށް ވިދާޅުވި ގޮތުގައި, މި މީހުން ހައްޔަރުކުރެވިފައި ވަނީ ރައްޔިތުންގެ އެއްބާރުލުމާ އެކުގައެވެ.
ސީރިޔާގެ ސަރުކާރުގެ ނިއުސް އޭޖެންސީ ސަނާއިން ވެސް ރިޕޯރޓްކުރި ގޮތުގައި, މި ހަފުތާގައި އަސަދަށް ވަފާތެރި މެންބަރުންނަށް އަމާޒުކޮށް ހައްޔަރުކުރުންތަކެއް ކުރިއަށް ގެންދެވިފައިވާ ކަމަށާއި އެ ހައްޔަރުކުރުންތަކުގައި ހަތިޔާރާއި ވަޒަން އަތުލެވިފައިވާ ކަމަށެވެ.
މި ލިޔުން ކިޔާލުމުން
